Агротехнологическай хайысхалаах кылаастары тэрийэргэ Мэҥэ-Хаҥалас улууһун Балыктаах орто оскуолата, Уус-Алдан улууһун Найахы уонна Байаҕантай орто оскуолалара сүүмэри аастылар. Бу нэһилиэктэргэ тыа хаһаайыстыбатын тэрилтэлэрэ баара оскуолаларга агро кылаастар арыллалларыгар бастыҥ төрүөтүнэн буолла.
Ол туһунан үөрэх миниистирэ Михаил Сивцев, миниистир бастакы солбуйааччыта Ирина Любимова, Артическай судаарыстыбаннай агротехнологическай үнүбүрсүтүөт ректор эбээһинэһин солбуйааччыта Константин Кривошапкин, СӨ үөрэхтээһини сайыннарыыга уонна идэни үрдэтиигэ үнүстүтүүт ыстаарсай преподавателэ Гаврил Адамов, улуустааҕы үөрэх салалтатын салайааччылара, оскуола дириэктэрдэрэ кыттыылаах мунньахха иһитиннэрдилэр.
Санатар этэр эбит буоллахха, билигин өрөспүүбүлүкэ үрдүнэн 27 муниципальнай тэриллиигэ уонна Дьокуускай куоракка 91 агро хайысхалаах оскуола баар. Агрооскуолалар сүөһү иитиитигэр, үүнээйи олордооһунугар, балыктааһыҥҥа, эмтээх от хомуйааһыныгар уо д. атын хайысхаҕа үлэлииллэр, кэнчээри ыччаты оҕо эрдэхтэриттэн үлэҕэ сыһыара үөрэтэллэр.
Саҥа тэриллэр агротехнологическай кылаастар тыа хаһаайыстыбатын сайдыытыгар саҥаны, туһалааҕы киллэрэргэ туһуламмыт үөрэх бырагырааматын тэрийэр сонун көрдөрүүлэри арыйар былааһакканан буолуохтара. Маны таһынан тыа хаһаайыстыбатын үрдүкү уонна орто үөрэх тэрилтэлэрин кытары бииргэ үлэлииллэрэ былааннанар.