Бу сааскы ылааҥы күннэргэ Уус Алдан киинигэр, Бороҕоҥҥо, Сэбиэскэй Союз Геройа В.Д. Лонгинов төрөөбүтэ 100 сылыгар аналлаах өрөспүүбүлүкэтээҕи “Снежный барс» байыаннай оонньуу 20-с төгүлүн ыытылынна.
Хас биирдии хамаандаҕа Бороҕон оскуолатын үөрэнээччилэриттэн волонтер оҕо уонна учуутал ананан, тиийбит күммүтүгэр эйэҕэстик көрсөн, оскуолаҕа олохтоотулар. Өрөспүүбүлүкэбит 13 улууһуттан байыаннай-патриотическай кулууптар 15 хамаандалара 10 көрүҥҥэ күөн көрүстүбүт.
Мин Бүлүү улууһун Баппаҕаайы М.А. Алексеев аатынан орто оскуолатын «Молодая гвардия» хамаандатын чилиэнэ буолабын. Кулууппут 2009 сыллаахха тэриллиэҕиттэн бу күрэххэ улууспутугар 4-с төгүлүн бастаан, өрөспүүбүлүкэ таһымыгар кытта кэллибит.
Бастакы күммүтүгэр “мандатнай” чааһын аастыбыт, билсиһии киэһэтигэр араас көрдөөх оонньуулары оонньоотубут.
Иккис күн. Сарсыарда эрдэ туран, суунан-тараанан, сарсыардааҥҥы минньигэс аһылыгы үссэнэн баран, дьэ күрэхтэһиибит саҕаланна. «Статен в строю, силен в бою» кэккэнэн хаамыы, «Равнение на Героев. Ратные страницы истории» дойдубут байыаннай историятын билиини тургутуу түһүмэхтэрэ буоллулар.
«Визитка» түһүмэҕэр бэйэбит улууспут, төрөөбүт нэһилиэкпит, хамаандабыт туһунан хоһоонунан, ырыанан, үҥкүүнэн хоһуйдубут.
Үһүс күн «Пулевая стрельба» түһүмэхтэн саҕаланна. Салгыы «Неполная разборка и сборка АК-74» аптамааты ыһыыга-хомуйууга күрэхтэстибит.
Үһүс түһүмэх – «Снаряжение магазина к АК(30 патронов)» аптамаат маҕаһыынын буулдьанан толоруу. Уонна бу күммүтүн түмүктүүр «Бег на 1000 метров» күрэх буолла.
“Снежный барс” күрэх төрдүс күнүгэр «Лыжная военизированная эстафета» уонна «Комплекс силовых упражнений» (кыргыттар “пресс хачайдыыллар”, уолаттар турникка тардыналлар) ыытылынна.
Күрэх кэнниттэн Афганистан сэриитигэр кыттыбыт байыастары кытта көрсүһүү буолла. Онтон «Доҕордоһуу киэһэтэ» түмүктүүр биэчэр буолла.
Бу түөрт күннээх тыҥааһыннаах киирсиилэри бэһис күн түмүктээтэ, кыайыылаахтары быһаарда. V миэстэҕэ тахсан, Чурапчы улууһун «Беркут» хамаандата Өлүөнэ остуолбаларыгар барар путевканан наҕараадаланна. IV миэстэлээх Үөһээ Бүлүү улууһун «Десантник» хамаандата “Сосновый бор” лааҕырга сынньанар путевканы ылла. Уус Алдан улууһун «Мүрү» хамаандата үһүс буолла уонна Россия куораттарынан күүлэйдиир «Золотое кольцо» путевканы тутта. II миэстэлээх Горнай улууһун «Сокол» хамаандата Владивосток куорат «Океан» лааҕырыгар сынньанар путевкаҕа тигистэ.
Бары көрүҥҥэ барытыгар бэйэтин күүһүн, кыаҕын, бэлэмин көрдөрөн, эрэллээхтик дакаастаан, Мэҥэ Хаҥалас «Кадеты» хамаандата I бочуоттаах миэстэҕэ таҕыста уонна Москва куоракка Россиятааҕы «Победа» байыаннай күрэххэ Саха сирин көмүскүү барар чиэһи сүктэ.
Биэс күннээх күрэххэ араас улуустартан сылдьар оҕолору кытта билсэн-көрсөн, билиибитин үллэстэн, уопут атастаһан, умнуллубат кэмнэри атаардыбыт.
Лена АЛЕКСЕЕВА, IX кылаас. “Көмүс бөрүө” эдкорпост, Илбэҥэ, Бүлүү.