Бу күннэргэ Амма-Наахара орто оскуолатын 3 үөрэнээччитэ Москва куоракка ыытыллыбыт «Первые шаги в науке» диэн Бүтүн Арассыыйатааҕы научнай-практическай кэмпириэнсийэҕэ кыттан үрдүк ситиһиилэннибит. Мин салайааччыбыныын Григорьева Надежда Аркадьевналыын «Проект бессмертная слава к 85-летию со дня рождения Д.Н. Гаврильева» үлэбит түмүгүнэн иккис истиэпэннээх диплому ылан, төрөөбүт дойдубут аатын ааттаттыбыт.
Кэмпириэнсийэ кэмигэр кэҥэс дойдубут киин куоратыгар Москваҕа тиийэн, атын үөрэнээччилэри кытта билсэн, билиибитин хаҥаттыбыт, бэйэбит чинчийиибитин көмүскээһиннэ улахан уопут ыллыбыт. Бу ситиһии – кэлэр кэмҥэ үөрэххэ-билиигэ өссө бөҕөх тирэх буолуо5а.
Научнай тэрээһин кэннэ, киин куорат кэрэ миэстэлэринэн сырыттыбыт. Дьиктилээх аан дойдуга — «Остров мечты» диэн саҥа, бөдөҥ атракционнар пааркаларыгар сылдьан, оонньууларынан дуоҺуйдубут, астык сынньалаҥҥа умсугуйдубут. Итини таһынан, култуура эйгэтинэн эмиэ кэрэхсэбиллээх экскурсияларга сырыттыбыт. Аатырбыт Третьяковскай галереяҕа нуучча уруһуйдьуттарын улуу айымньыларын көрөн, дууһалыын байдыбыт, Сэп-сэбиргэл музейыгар былыргы сэрии сэбин көрөн, устуоруйаны кытта ыкса билистибит. Космонавтика музейа – киһи куйаары баһылаабыт улуу ситиһиилэрин көрдөрөр түмэл, киһиэхэ кэлэр кэмҥэ дьулуһууну, үөрэҕи-билиини өссө үрдүктүк тутарга ыҥырар.
Москвариумҥа сылдьан, араас балыктары, косаткалары, скаттары, дельфиннэри уонна акулалары көрөн олус астынныбыт, олор ураты кэрэлэрин сөхтүбүт.Уонна, биллэн турар, Москва зоопарката! Наһаа үчүгэй, интэриэһинэй этэ. Араас дойду кыылларын-сүөллэрин көрөн, айылҕа баайын, дьиктитин өссө чугастык билистибит.
Бу айан биҺиэхэ, үөрэнээччилэргэ, билим эйгэтигэр бастакы хардыы буолан аан дойдуну, култуураны, устуоруйаны билэргэ улахан арыйыы буолла. Гаврильева Айсаана 2 истиэпэннээх дипломунан, Александров Семен кыайыылаах үрдүк аатын ылла. Болугурдары кытта бииргэ «Космос» гостиницаҕа түҺэн, доклад ааҕан, сынньанан үөрэн- көтөн, элбэҕи билэн-көрөн кэллибит. Салайааччыларбытыгар махтал!
Михайлов Сандал, VI кылаас,
«Аартык» медиакиин эдэр корреспондена, Амма-Наахара