Биһиги нэһилиэкпитигэр 9 олоҥхоһут олорон ааспыта. Билиҥҥи кэмҥэ олоҥхону кытта сибээһи быспакка, нэһилиэк дьоно олоҥхону толоро, тарҕата сылдьаллар. Сылын аайы биһиэхэ олоҥхо деката үрдүк таһымнаахтык ыытыллар https://vk.com/@keskilmedia-neiliekpitiger-oloho-dekadata
Бу күннэргэ «Чуораанчык» оҕо саадыгар Амма улууһугар, Эмис нэһилиэгэр биллэриллибит Олоҥхо сылын түмүктүүр үөрүүлээх тэрээһин бэрт сэргэхтик буолан ааста. https://t.me/keskil_media2020/14196

Үөрүүлээх чааска «Чуораанчык» иитиллээччилэрэ ыалдьыттары алаадьылаах көрүстүлэр.

Сэбиэдиссэй эбээһинэһин толорор Ирина Ивановна Ноговицына эҕэрдэ тылын, оҕо саадын ситиһиитин туһунан кэлбит дьоҥҥо сырдатта.
– 2024 сыл Амма улууһугар, Эмис нэһилиэгэр Олоҥхо сыла биллэриллибитэ. «Чуораанчык» оҕо саада үлэтин-хамнаһын олоҥхоҕо тирэҕирэн туһаайан ыытар. Өрөспүүбүлүкэҕэ, улууска ыытыллар олоҥхо тэрээһиннэригэр кыттабыт. Олоҥхобут ыһыаҕар оҕо саадын биирдии үлэһитэ иккилии олбох тикпиппит. Онон барыта холбоон 46 олбох буолбута. Маны таһынан Саха өрөспүүбүлүкэтин Үөрэҕин министиэристибэтиттэн Оҕо саас сылынан хас биирдии иитээччигэ уопуту тарҕатыы иһин сертификаттары, Махтал суруктары туппуппут биһиэхэ үрдүк ситиһии буолар. Олоҥхо үөрэҕин кэлэр көлүөнэ ыччаттарыгар бу курдук иҥэрэ туруохпут диэн бигэ эрэллээхпит, – диэн Ирина Ивановна бэлиэтээн эттэ.
Нэһилиэкпит баһылыга Прокопий Петрович Бубякин кэлбит ыалдьыттарга, бэтэрээн учууталларга, махтанан оҕолорго бэйэтин баҕа санаатын тиэртэ.

Бу күн оҕо саадын кырачаан иитиллээччилэригэр нэһилиэк аҕа саастаах дьоно, түмсүүлэр кыттыыны ылбыттара көлүөнэ ситимин көрдөрдө.
Ол курдук «Көлүкэчээн» эбээлэр түмсүүлэрэ биир дойдулаахпыт Ю.П. Борисов суруйбут «Баһырҕастаах аттаах Баабый Баатыр» олоҥхону иһитиннэрдилэр, «Мин дууһам ыллыыр» ырыаны бэлэх ууннулар.

Нэһилиэкпитигэр биир бастыҥ үлэлээх «Далбар» ансаамбыл, кини салайааччыта Наталья Николаевна Константинова «Чуораанчык» «Сыарҕалаах атынан айан» бырайыагар тэҥҥэ үлэлэһэр. Бу күн «Далбардар» оҕолорго үтүө санааларын тиэртилэр. Оскуола иһинэн үлэлиир «Эрэкэ-дьэрэкэ» фольклорнай куруһуок салайааччыта Матрена Иннокентьевна Владимирова, култуура киинин дириэктэрэ Анжелика Александровна Иванова оҕолорго эҕэрдэ тылларын эттилэр.
«Чуораанчык» оҕо саадын иитээччитэ Лена Аркадьевна Тихонова үлэлэрин ситиһиитин туһунан сиһилии кэпсээтэ.

Салгыы «Олоҥхо дойдута – мин дойдум» олоҥхо декадатын чэрчитинэн, квест оонньуу ыытылынна. Барыта 8 хамаанда кытынна. Оҕолор төрөппүттэрин кытта оонньоотулар. Кыайыылаахтарынан Уйгулаана, Саша Сысолятиннар, Кэрэчээнэ, Прасковья Афанасьевалар, Давид, Мая Новиковтар, Ильяна, Айкуо, Нина Ноговицыналар буоллулар. Бары кыттааччылар туоһу суругунан наҕараадаланнылар.

Онтон «Олоҥхо оонньуура биһиги дьиэ кэргэҥҥэ» диэн күрэххэ дьиэ кэргэнинэн олус көхтөөхтүк кытыннылар. Тимофеевтар, Ларионовтар, Рожиннар дьиэ кэргэттэрэ кыайыылааҕынан ааттаннылар.
Прасковья, Кэрэчээнэ Афанасьевалар, Евдокия, Афоня Бубякиннар, Мая, Дамир Новиковтар 1, 2, 3 үрдэл анал ааттары туттулар.
Салгыы «Чуораанчыктар» ыалдьыттарын кытта сандалы тула олорон сахалыы ойулуктары көрөн, ирэ-хоро кэпсэттилэр.
Бу тэрээһиҥҥэ сылдьан баран, олоҥхо оҕону, дьиэ кэргэни, нэһилиэги бииргэ түмэр диэн сыаналаатым.
Эрчим НИКОЛАЕВ, IX кылаас,
В.М. Новиков-Күннүк Уурастыырап аатынан Эмис орто оскуолата, Амма
Ааптар видеота, хаартыскаҕа түһэриилэрэ