Иккис сылбытын «Иэйиэхсит » оҕо бөлөҕө бөлөхпүт иһинэн «Оҕо уонна оҕо» бырайыагынан үлэлии сылдьабыт. Ааспыт үөрэх сылыгар бөлөххө иккис кылаастан уон биирис кылааска дылы отут оҕо сылдьыбыта, сылдьыбыт оҕолор бары хас нэдиэлэ аайы күрэх ыыппыттара.
Бырааһынньык нэдиэлэтигэр түбэспит оҕо онно сөптөөх күрэҕи толкуйдаан ыытар, онтон көннөрү күннэр нэдиэлэлэригэр, холобур, Сахамин Селясинов (11 кылаас) «Любимый персонаж», Кирилл Быккасов (6 кылаас) «Ис сүрэхтэн», Марина Лаптева (2 кылаас) «Мин дьиэтээҕи кыылым», Рудольф Петров (4 кылаас) «Хаар киһитэ оҥор» о.д.а. тэрийэн ыыттылар.
Быйылгы үөрэх сылыгар бырайыак эмиэ салгыы үлэлиир. Холобур, Ксения Семёнова (8 кылаас) «Кыһыҥҥы хоһооммор хоһуйабын», Валерий Ласточкин (8 кылаас) «Ким төһө элбэх массыына мааркатын билэрий», Сайаан Павлов (7 кылаас) Исидор Никифорович Барахов диэн тылтан тыллары таһаар, онтон мин Төрөөбүт тыл күнүгэр «Эн сахалыы төһө билэҕин» диэн биктэриинэ күрэҕин ыыппым.
Күрэхпэр бастакы миэстэни Камилла Малахаева, иккис миэстэни Владислав Таныков, үһүс миэстэни Ангелина Петрова ылбыттара. Бирииһи ийэм Галина Капитоновна туруорбута. Ити курдук хас биирдии күрэҕи ыыппыт оҕо миэстэни таһаардаҕына төрөппүттэрэ бирииһи олохтууллар.
«Оҕо уонна оҕо» бырайыак күрэҕи ыытар оҕоҕо күрэх балаһыанньатын оҥороругар толкуйдуурун, күрэххэ ыыппыт үлэлэри бэрэбиэркэлээн түмүгү таһаарарыгар эппиэтинэстээх буоларын, хас биирдии оҕоҕо чиэһинэйдик сыһыаннаһарыгар үөрэтэр, ол биһиги инники олохпутугар туһалыыр буолуохтаах.
Онтон күрэххэ кыттар оҕо күрэх балаһыанньатынан көрөн кинигэ ааҕар, ыйыталаһар, тугу эрэ оҥорор, кыайыыга дьулуһар, бу эмиэ иитэр суолтата үрдук дии саныыбыт.
Үөрэх кэннэ быыс булан маннык дьарыгырар туһаны эрэ аҕалар.
Шура Александрова, «Иэйиэхсит» оҕо бөлөҕө.