Алтынньы 27 күнүгэр Маарга «21 үйэҕэ төрөппүт эппиэтинэһэ: ыҥырыылар, эндирдэр, кыахтар» диэн тиэмэҕэ төрөппүт көҕүлээһининэн ыытыллар III улуустааҕы төрөппүт форума буолан ааста. Барыта 200 кыттааччы – төрөппүттэр, иитээччилэр, учууталлар, маны таһынан Ньурба оройуонун профилактика уорганнара, уопсастыбаннас бэрэстэбиитэллэрэ – оҕону иитии араас боппуруостарыгар санаа атастастылар.
Быйыл төрөппүт форума профилактика уорганын кытта ыкса үлэлэһэн ыытылынна. Ньурба оройуонун үөрэҕириитин начальнига Ушканов Ф.Ф. төгүрүк остуолу салайан ыытта, төрөппүттэри кытта кэпсэтиигэ оҕо араас куйаар ситимигэр, сигэлэргэ киирэн оҕоҕо буортулаах информацияны көрөрө, интэриэһиргиирэ элбээбитин бэлиэтээтэ. Бу барыта оҕо ис туругун кэбирэтэрин ыйда. Онон төрөппүт оҕо төлөппүөҥҥэ олорорун хааччахтыыр эбэтэр оҕо ситимҥэ тугу көрдүүрүн кэтиир сорук турда. Ньурба оройуонун прокурора Сивцев А.А. оҕо цифровой эйгэтин сөпкө тэрийиигэ төрөппүт эппиэтинэстээҕин бигэргэттэ.
Ньурба оройуонун дьаһалтатын опека уонна попечительство салайааччыта Алексеева В.В. «Сокуону кэһиини сэрэтии үлэтигэр дьиэ кэргэҥҥэ иитии суолтата», Ньурба оройуонун оҕоҕо уонна дьиэ кэргэҥҥэ көмөлөһөр киин салайааччыта Алексеева М.В. «Комплекснай киин үлэтигэр дьиэ кэргэни харыстыыр эйгэни тэрийии», ис дьыала ПДН отделын сүрүн инспектора Кириллина М.В. төрөппүттэри кытта аһаҕастык кэпсэттилэр. Оҕо бэрээдэги кэһиитин статистикатын билиһиннэрдилэр, оҕо сокуону кэһиитэ кэнникки кэмҥэ үрдээбитин бэлиэтээтилэр.
Төрөппүт форума оҕону итиигэ-үөрэтиигэ дьиэ кэргэн оруолун, төрөппүт эппиэтинэһин үрдэтиигэ, биир ситимнээх үлэ хайдах барыахтааҕын, төгүрүк остуолга, практикумнарга кэпсэттилэр, Ньурбатааҕы техникум үлэһиттэрэ мастерскойдарыгар экскурсиялатан, үөрэхтэрин кытта билиһиннэрдилэр. Уһуйаан иитээччилэрэ, оскуола, эбии үөрэхтээһин учууталлара, куруһуок салайааччылара, араас интэриэһинэй маастар-кылаастары төрөппүттэргэ анаан оҥордулар.
Секция салайааччылара оҕону иитиигэ сүбэ-ама биэрдилэр: дьиэ кэргэн үгэстэрин герой-ийэ, СР үтүөлээх учуутала, СР үөрэҕириитин туйгуна Яковлева Д.Ф., оҕо ситиһиилээхтик үөрэнэригэр хайдах көмөлөһүөххэ сөбүн ТПМПК салайааччыта Васильева С.И., логопед-учуутал Федорова И.Н., дефектолог-учуутал Захарова Х.А., куйаар ситимэ оҕоҕо буортулаах өруттэрин IT-куб эбии үөрэхтээһин учуутала Игнатьев М.В., бастакы медицинскай көмөнү оҥоруу улуус сүрүн бырааһа Ксенофонтов А.М., суол быраабылатын күннээҕи тутуһууну полиция старшай лейтенана Кириллин А.С., оҕо уйулҕатын кытта үлэлэһиини, Ньурба оройуонун оҕоҕо уонна дьиэ кэргэҥҥэ социальнай-психологическай өйөбүл киинин педагога-психолога Петрачук Н.В., оҕону кыра сааһыттан иитии өрүттэрин уһуйаан итээччилэрэ сырдаттылар.
Түмүк нэһилиэгин аҕа түмсүүтэ форумҥа кэлбит аҕалары Дьаппыыда үрэххэ илим көрдөрөн, ыалдьыттар илии тутуурдаах бардылар. Төрөппүттэр холобур оҥостор, нэһилиэкпит киэҥ туттар элбэх оҕолоох Яковлевтар «Дьиэ кэргэн» ырыаларынан форуму түмүктээтилэр.
Форум түмүгүнэн санаа атастаһыытыгар: аҕа оруолун үрдэтэргэ, уол аҕатыныын күрэҕи оскуолалар ыккардыларыгар тэрийиини, уол оҕоҕо аналлаах түмсүүнү тэрийии, оҕо төлөпүөҥҥэ сөптөөх бириэмэ иһигэр олорорун, ханнык сигэлэри киирэн көрөрүн хонтуруолга ылыы, оскуола иһигэр оҕо бары биир форманы кэтэрин ирдииргэ.
Форум төрөппүттэргэ олус туһалаах буолла, инникитин да маннык улахан хабааннаах, элбэх туһалаах кэпсэтиилэр буола туралларын баҕаралларын туһунан бэлиэтээтилэр.
Маар орто оскуолатын “Юла” медиакиинэ