Ньурба улууһун Дьаархан нэһилиэгин ыала Григорьевтар оҕо иитэр дьиэ кэргэн. Бэйэлэрэ биэс оҕолорун таһынан, тулаайах хаалбыт өссө биэс оҕону иитэ сылдьаллар. От ыйын 21 күнүгэр Ньурба улууһун элбэх оҕолоох ыалларыгар бэлиэ түгэн буолла. Ол туһунан Ньурба улууһун дьаһалтатын пресс-киинэ иһитиннэрэр.
Улуус 10 оҕолоох үһүс ыалыгар Семен Русланович уонна Акулина Юрьевна Григорьевтар дьиэ кэргэттэригэр СӨ судаарыстыбаннай бырагырааматынан массыына ылалларыгар 771, 3 тыһ. солк. сууммалаах сэртипикээт туттарылынна. Бу иннинэ 2017 с. Хатыы нэһилиэгин олохтоохторо Васильевтар дьиэ кэргэттэригэр уонна 2019 с. Ньурба куоратын Кондратьевтар дьиэ кэргэттэригэр элбэх оҕолоох дьиэ кэргэттэри массыынанан хааччыйар туһунан СӨ Бырабыыталыстыбатын 22.10.2012 с. Уурааҕар сөп түбэһиннэрэн, маннык дьоһун көмө оҥоһуллубута.
Үөрүүлээх тэрээһиҥҥэ Ньурба улууһунааҕы социальнай көмүскэл салалтатын салайааччыта Ирина Находкина, салалта социальнай боппуруостарга исписэлииһэ Надежда Николаева, улуус дьаһалтатын социальнай уонна дьиэ кэргэн боппуруостарыгар исписэлииһэ Евгения Кириллина, саастарын ситэ илик оҕолор бырааптарын көмүскээһин исписэлииһэ Валерия Алексеева, Дьаархан нэһилиэгин салайааччылара кыттыыны ыллылар.
Билигин 10 оҕону көрө-истэ сылдьар Григорьевтар дьиэ кэргэттэрэ тыа хаһаайыстыбатын министиэристибэтин бырагырааматынан икки этээстээх дьиэ туттан киирэн олороллор. Улахан ыал аҕата Семен Русланович «Вилмар» кэпэрэтиипкэ үлэлиир, ийэлэрэ Акулина Юрьевна оҕолонуон иннинэ кулуупка үлэлээбитэ. Ыал икки оҕото билигин лааҕырга Анапаҕа уонна Дьокуускай куоракка сынньана сылдьаллар. Ыал аҕата бу күһүн массыына ыытарга үөрэнэн быраап ыларга былаанныыр.
Улахан дьиэ кэргэҥҥэ тимир көлө олус наадалааҕа биллэр. Онон Григорьевтар дьиэ кэргэттэрэ үөрүүлэрэ муҥура суох. Эҕэрдэлиибит!