Ыам ыйын 24 күнүгэр Тиһэх чуораан бырааһынньыга оскуолабытыгар өрө көтөҕүүлээхтик ыытылынна. Бу күн оскуоланы бүтэрэр үөрэнээччилэрбитигэр ордук суолталаах буолла.
Олус долгутуулаах, умнуллубат бэлиэ күн Арассыыйабыт уонна төрөөбүт Сахабыт Сирин гииминэн саҕаланна.
Алын сүһүөх кылаастары (кылаас салайааччыта Аянитова О.Ю.), орто сүһүөх оскуоланы (кылаас салайааччыта Баишева П.К.) уонна сүрүн уопсай үөрэхтээһини түмүктүүр үөрэнээччилэри оскуолабыт директора Гайдар Гаврильевич Винокуров, маҥнайгы учуутал Софья Павловна Никулина, кылаас салайааччыта Вера Семеновна Осипова, төрөппүт Варвара Васильевна Туласынова эҕэрдэлээтилэр, олох киэҥ суолугар үктэнэллэригэр алгыс тылын анаатылар. Маҥнайгы кылаас үөрэнээччилэрэ «Бастыҥнар хамсааһыннарын» бэлиэтин, сөмөлүөтү, бииргэ үөрэнэр табаарыстара Ангелина Жиркова эҕэрдэ тылын кэннэ, инникигэ эрэллээхтик дьулуһалларыгар анаан туттардылар. Үөрэххэ директоры солбуйааччы Александра Дмитриевна Осипова педсовет уурааҕынан быйылгы выпускниктар 100% биир кэлим эксээмэҥҥэ киирбиттэрин билиһиннэрдэ. Тэрээһин долгутуулаах түгэннэрин 4 кылаас үөрэнээччилэрин вальса, выпускниктар үҥкүүлэрэ, ырыалара, оһуохайдара киэргэттэ.
Бу күн маанылаах ыалдьыттарынан Уус Таатта орто оскуолатын 1974 сыллаахха бүтэрбит выпускниктара буоллулар. Кинилэр саҥа оскуоланы бүтэрэр оҕолору эҕэрдэлээн, үөрэммит оскуолаларыгар ахтылҕан тылын анаан, бүгүҥҥү күҥҥэ үөрэнэ сылдьар оҕолорго анаан, сынньаналларыгар тимиртэн чочуллан оҥоһуллубут ыскамыайкаларын бэлэхтээтилэр.
Тиһэх чуораан иккис түһүмэҕинэн, үөрэххэ, үлэҕэ, научнай-практическай ааҕыыларга, спортка, араас куонкурустарга ситиһиилэммит выпускниктары бэлиэтиир сылын аайы ыытыллар анал ааттары туттарыы церемонията буолла. Ол курдук, «Сыл бастыҥ үөрэнээччитэ» анал ааты 11 кылаас үөрэнээччитэ Винокуров Слава, 9 кылаас үөрэнээччитэ Макарова Дарина туттулар. Анал стипендиялары Саха Өрөспүүбүлүкэтин үөрэҕириитин туйгуна, нуучча тылын уонна литературатын учуутала Жанна Ильинична Постникова, Арассыыйа Бэдэрээссийэтин Үөрэхтээһинин Бочуоттаах үлэһитэ, история уонна обществознание учуутала Марианна Васильевна Максимова анаатылар.
«Сыл бастыҥ активиһа» анал ааты ыллылар: Ил Дархан гранын хаһаайына, 11 кылаас үөрэнээччитигэр Готовцев Кириллга уонна 2022-2023 үөрэх дьылын үөрэнээччилэр салайыныыларын лидера Попова Даша. Кинилэргэ анал стипендиялары Саха Өрөспүүбүлүкэтин физическэй култуураҕа уонна спортка туйгуна, оскуола директора Гайдар Гаврильевич Винокуров, Саха Өрөспүүбүлүкэтин үөрэҕириитин туйгуна, «Азия оҕолоро» пуонда стипендията, Макаренко аатынан Бүтүн Арассыыйатааҕы бэлиэ хаһаайына, география учуутала Полина Кирилловна Баишева туттардылар.
«Сыл бастыҥ спортсмена» анал аат иҥэрилиннэ:өрөспүүбүлүкэтээҕи Хотугу многоборье Чемпионатын кыайыылааҕар, улуус ГТОҕа, сүүрүүгэ биир бастыҥ спортсменыгар, үөрэнээччилэр «Спортивные Якутяне»спартакиадаларын призеругар, 8 кылаас үөрэнээччитигэр Егасов Валентиҥҥа уонна оҕунан, саанан ытыыга улуус призеругар, 11 кылаас үөрэнээччитигэр Находкина Туйаараҕа. Анал стипендиялары Саха Өрөспүүбүлүкэтин үөрэҕириитин туйгуна, физика уонна математика учуутала Лидия Семеновна Иванова, Саха Өрөспүүбүлүкэтин физическай культураҕа, спортка уонна үөрэхтээһинин туйгуннара Алитет Иванович Кочнев биэрдилэр.
«Сыл бастыҥ талаана» анал ааты оскуола лидера, өрөспүүбүлүкэтээҕи, улуустааҕы куонкуурстар кыайыылааҕа, 9 кылаас үөрэнээччитэ Алена Колодезникова биир санаанан ылла. Киниэхэ стипендияныСаха Өрөспүүбүлүкэтин үөрэҕириитин туйгуна, Макаренко аатынан Бүтүн Арассыыйатааҕы бэлиэ хаһаайына Варвара Васильевна Данилова туттарда.
«Сыл уһулуччулаах ситиһиитэ» анал аакка хотугу многоборье Бүтүн Арассыыйатааҕы Арктическай оонньууларын призера, 9 кылаас үөрэнээччитэ Володя Гуляев таҕыста. Киниэхэ бэйэтин стипендиятын Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин үөрэхтээһинин Үтүөлээх үлэһитэ, Гражданскай килбиэн бэлиэ кавалера, Арассыыйа Бэдэрээссийэтин Үөрэхтээһинин Бочуоттаах үлэһитэ, өр сылларга оскуолабыт директорынан үлэлээбит Петр Гаврильевич Дягилев анаата.
Үгүс сылларга оскуолабыт үгэс буолбут тэрээһиннэрэ элбэхтэр. Олортон биирдэстэрэ, сыл устата үс этаабынан ыытыллар «Сыл бастыҥ интеллектуала» оонньуу буолар.Быйылгы үөрэх дьылын түмүгүнэн, 7 кылаас үөрэнээччитэ Тая Николаева, Дарина Макарова кыайыылааҕынан тахсан,«Сыл бастыҥ интеллектуала» анал ааттары ыллылар. Педагогическай үлэ бэтэрээнэ, Саха Өрөспүүбүлүкэтин үөрэҕириитин туйгуна Анна Алексеевна Тарабукина, Саха Өрөспүүбүлүкэтин үөрэҕириитин туйгуна, Арассыыйа Бэдэрээссийэтин үөрэхтээһинин Бочуоттаах үлэһитэ, наставник учуутал Василиса Петровна Неустроева оонньуу кыайыылаахтарыгар ленталары ииллилэр, стипендияларын анаатылар.
Неустроевтар педагогическай династияны саҕалааччы, Саха өрөспүүбүлүкэтин «Ийэҕэ үрдүкү махтал” бэлиэ хаһаайката, «Албан аат» 1,2,3 степеннээх кавалера Анна Николаевна Соловьева анал стипендиятын 11 кылаас үөрэнээччитигэр Бурнашев Артемҥа, Россия суруналыыстарын Союһун чилиэнэ, Саха Өрөспүүбүлүкэтин Учууталлар учууталлара бэлиэ хаһаайына, суруйааччы Егор Алексеевич Жирков оҕолорун анал стипендиятын 11 кылаас үөрэнээччитигэр Попова Дашаҕа, Үтүө дьыаланы оҥорууга Егор Петрович Борисов ийэтин, бииргэ төрөөбүтүн, табаарыстарын анал стипендиятын 8 кылаас үөрэнээччитэ, бастыҥ волонтер, Попов Димаҕа, педагогическай үлэ ветерана, буойун–учуутал, 2024 сылга төрөөбүтэ 100 сылын бэлиэтиир Николай Николаевич Максимов оҕолорун, дьиэ кэргэнин анал стипендиятын 9 кылаас үөрэнээччитигэр Гуляев Володяҕа, Эдэр учууталлар стипедияларын 11 кылаас үөрэнээччитигэр Жирков Гошаҕа туттардылар.
Олоххо биирдэ буолар үтүө тэрээһин выпускниктар оһуохайдарынан түмүктэннэ. Таһаарааччы Даша Попова оһуокайа ыраахха диэри дьиэрэйэн, быйылгы выпускниктарбытын Үрдүккэ, сырдыкка көтүттэ. Онтон оскуола сылларын тиһэх чуораанын тыаһатар чиэс маҥнайгы кылааска киирэллэригэр билии-көрүү сырдык аартыгар сирдээбит, маҥнайгы чуорааны тыаһаппыт Туйаара Находкинаҕа уонна бастыҥ үөрэнээччи, Ил Дархан гранын хаһаайына Кирилл Готовцевка бэрилиннэ. Чуораан лыҥкыначчы тыаһаан, бука барыларын олох киэҥ суолугар үктэннэрдэ.
Анна Софроновна Кочнева, дириэктэри иитэр үлэҕэ солбуйааччы.
Уус Таатта, Таатта.