Соторутааҕыта Кэбээйи улууһун Мукучу нэһилиэгин олохтоохторо күргүөмүнэн миитиҥҥэ таҕыстылар. Миитин төрүөтэ – саҥа оскуола тутуутун туруорсуу. 2016 сыллаахтан тутуута саҕаланыахтаах оскуола, билиҥҥи туругунан, сыбаайалара эрэ анньыллан тураллар. Былаанынан, 2019 сылга тутуллан үлэҕэ киириэхтээх этэ. Билигин оскуола тутуута 2022-2024 сс.көһөрүллэр уонна бырайыага эргэрбит диэн буолла.
Мукучу 1200 нэһилиэнньэлээх — улууска иккис улахан нэһилиэк. Биэс үөрэх, эбии үөрэхтээһин тэрилтэлэрэ үлэлииллэр, ол иһигэр — гимназия уонна И.Е.Левин аатынан орто оскуола.
2016 с. 275 миэстэлээх саҥа таас оскуола сыбаайата түһэн, эргэ мас оскуола, интэринээт, мусуой, мастарыскыайдар дьиэлэрэ – барыта көтүрүллүбүтэ.
Онон билигин оҕолор эргэ оскуоланан, Оҕо айымньытын дьиэтинэн, музыкальнай оскуоланан кыһыҥҥы тымныыга сүүрэ сылдьан үөрэнэллэр. Ол эргэ оскуола “аварийнай” туруктаах, ардахха кырыыһата тэстэ турар, кыһынын тыбыс-тымныы. Роспотребнадзор санитарнай нуорманан эһиил сабарга быһаарбыта.
Онон эһиил эргэ оскуола сабыллар, саҥа оскуола олох да суох – оччотугар оҕолор ханна үөрэнэллэр?
Аны атырдьах ыйынааҕы педсовекка: “Эһиилгиттэн гимназия уонна оскуола холбоноллар”, — диэн этиллэн турар. Боппуруос өссө уустугурда…
Ааптар: Таисия Алексеева