Дьокуускайга кулун тутар 11-12 күннэригэр Н.О. Кривошапкин аатынан 5 №-дээх оскуолаҕа «Будущий дипломат» куонкурус ситиһиилээхтик ааста. Барыта 50-тан тахса үөрэнээччи улахаттар уонна кыралар лигаларыгар түмүктүүр түһүмэххэ ыҥырыллан кытынна. Эссе, дебат, араатардааһын күөн күрэстэригэр туйгуннук кыттан, Дьокуускай куорат В.И. Кузьмин аатынан 30 нүөмэрдээх оскуолатын үөрэнээччитэ Тимур Герц муҥутууур кыайыылааҕынан ааттанна уонна Москваҕа Дипломатическай академияҕа туттарсан киирэргэ мэктиэлээһиннээх сертификаты тутта!
— Күөн күрэс хас биирдии түһүмэҕэ уустуктардаах этэ. Биһиги бэйэбит билиибитин, сатаан саҥарар дьоҕурбутун, дьону итэҕэтэр кыахпытын тургуттубут. Маныаха холкутуйар, долгуйбат буолуу суолталаах. “Евромайдан: потерянное десятилетие Украины” тиэмэҕэ эссебин суруйбутум. Кыра сааспыттан история, обществознание хайысхатыгар умсугуйбутум. Политика эйгэтин сэҥээрэбин,—диир Тимур Герц.
«Дипломат — олох бары хайысхатыгар билиитэ киэҥ уонна чиҥ буолуохтаах«
Ян Карамзин, Л.В. Киренскэй аатынан Амма лиссиэйин Х “А” кылааһын үөрэнээччитэ, “Бастакылар” хамсааһын Сүбэтин бэрэссэдээтэлин солбуйааччы, “Будущий дипломат” куонкуруска “Лучший спикер дебата” номинация кыайыылааҕа:
— Мин общественнай үлэни сэҥээрэбин, сөбүлүүбүн, тоҕо диэтэххэ, интэриэһинэй уонна элбэх үөрүйэҕи биэрэр. Инникитин салалтаҕа үлэлиэхпин баҕарабын. “Будущий дипломат” куонкурска бастакыбын кытынным. Куонкурус хаамыытын уонна тэриллиитин сөбүлээтим. Бастакы күҥҥэ “Киинэ тыйаатырдара тоҕоосторун сүтэрдилэр” уонна “Интернет СМИ-лэрин регистрацилааһын туһата үгүс” диэн тиэмэлэргэ кэпсэтиигэ кыттан, мөккүһэн ыллыбыт, санаабытын этиннибит. Инникитин “Будущий дипломат” кыттыахтаах оҕолорго үчүгэй бэлэми баҕарабын. Дипломат—олох бары хайысхатыгар билиитэ киэҥ уонна чиҥ буолуохтаах. Талбыт эссем СӨ Бастакы Президенэ Михаил Николаев норуоттар икки ардыларынааҕы хайысхаҕа үлэтигэр ананар. Кини биһиги өрөспүүбүлүкэбит Кэриэйэ, Кытай, Япония курдук сайдыылаах дойдулары кытары ситимнэһэригэр, сыһыаннаһарыгар олугу маҥнайгынан уурбута. Михаил Ефимовиһы, үлэтин үрдүктүк саныыбын, киниэхэ сүгүрүйэбин. Алын кылааска үөрэнэ сылдьан, Дьокуускайга “Бааһынай” ырыынагар Михаил Ефимовиһы дьоммун кытары көрбүттээхпин. Кини атыы-эргиэн эрээттэрин сирийэн көрө сылдьара.
Кимнээх кыайдылар?
Кыралар лигалара:
I миэстэ—Томпо улууһун Ыҥаа оскуолатын VI кылааһын үөрэнээччитэ Айыына Никифорова;
II миэстэ – Ленскэй куорат 3 №-дээх оскуолатын VI кылааһын үөрэнээччитэ Михаил Мыреев;
III миэстэ—Анаабыр улууһун Сааскылаах оскуолатын VI кылааһын үөрэнээччитэ Алдана Винокурова.
Үрдүкү кылаастар лигалара:
I миэстэ уонна СӨ ИЛ Дарханын стипендиятыгар сертификат – Сунтаардааҕы политехническай лиссиэй-интэринээт Х кылааһын үөрэнээччитэ Федот Алексеев;
II миэстэ – А.Е. Мординов аатынан Тааттатааҕы лиссиэй Х кылааһын үөрэнээччитэ Михаил Марков;
III миэстэ – Н.О. Кривошапкин аатынан Дьокуускайдааҕы 5 №-дээх оскуола IX кылааһын үөрэнээччитэ Александр Васильев.
Күөн күрэс “Интерсфера” норуоттар икки ардыларынааҕы ыччат ситимин сайыннарар кэммиэрчискэйэ суох тэрилтэ президенэ Николай Дьяконов быһаччы кыттыытынан, көҕүлээһининэн, РФ Тас дойдулары кытары дьыалаларга министиэристибэтин Дьокуускайдааҕы бэрэстэбиитэлистибэтин, СӨ үөрэҕин уонна наукатын, Тас дойдулары кытары сыһыаҥҥа уонна норуоттар дьыалаларын министиэристибэлэрин, “Юные якутяне” өрөспүүбүлүкэтээҕи тирэх киин өйөбүллэринэн 2007 сылтан тиһигин быспакка ыытыллар.
Жанна Леонтьева.
Ааптар уонна “Юные якутяне” тирэх киин түһэриилэрэ.
keskil14.ru