Күндү оскуолам! Эн боруоккун аан бастаан атыллыахпыттан ыла Эн мин олоҕум биир тутаах чааһа буолбутуҥ. Мин манна ааҕарга, суруйарга эрэ буолбакка, соруктары быһаарарга, олоҕум биир саамай кэрэ кэмин оҕо сааспын атаардым.
Хас күн аайы Эн истиэнэҕэр билиигэ-көрүүгэ, инники кэскилгэ хардыылары оҥорон кэллим. Учууталларым, бииргэ үөрэнэр доҕотторум өйөбүллэринэн бу хардыылары чэпчэкитик, чиҥник, эрэллээхтик оҥордум.
Эн биһикки, күндү оскуолам, экзаменнарга бэлэмнэнэрбэр, саҥа уларыйыыларга, ыарахан да кэмнэргэ бэйэ-бэйэбитин өйөһөн, бииргэ атаарбыт хас биирдии күннэрбит миэхэ олус күндүлэр.
Оскуолам миигин предметтэргэ эрэ буолбакка, элбэххэ үөрэттиҥ: хамаанданан үлэлииргэ, тулуурдаах буоларга, аттыбар баар дьоннор санааларын ытыктыырга, ылынарга.
Эйигин, күндү оскуолабын кытта атаарбыт үөрүү-көтүү аргыстаах, курус да түгэннэрдээх кэмнэрбин хаһан да умнуом суоҕа. 11 сыл устата Эн сылаас, истиҥ эйгэҕэр оҕо сааһым кэрэ кэмнэрин көрөн-истэн, бүөбэйдээн илдьэ сылдьыбыккар махтанабын. Эн мин сүрэхпэр куруук бааргын!
Арина СОТНИКОВА, Степан Кузьмич Макаров аатынан
Чурапчы гимназиятын 30-с выпуһа, «Кэскил» медиа оскуола юнкора