Быйыл 2022 сылга Саха өрөспүүбүлүкэтэ төрүттэммитэ 100 сылын бэлиэтээтэ.
Туспа суолунан көҥүллүк сайдан кэлбит Сахабыт сирин туһунан “Чуораанчык” сурунаал ааҕааччылара суруйаллар.
«Идэ куоратын» тэрийиэххэ
Сайынын дьиэ кэргэмминээн сири-дойдуну кэрийэрбитин, муораҕа сөтүөлүүрбүтүн астынабыт. Ол эрээри төрөөбүт Сахам сирин олус ахтар уонна таптыыр эбиппин. Дойдум салгына миэхэ ордук чугас.
Мин олорор куораппар Мииринэйгэ оҕолорго аналлаах саха сылгытын үөрэтэр оскуола баара буоллар дии саныыбын. Хас биирдии үөрэнээччи аттары көрөргө-истэргэ, хайдах аһатарга, хаамтарарга үөрэниэ этэ. Өссө оҕолорго аналлаах «Идэ куората» тэриллиэн баҕарабын. Оннук бырайыагы тас дойдуга сылдьан олус сэҥээрэ көрбүтүм. Киһи сөбүлүүр идэтигэр үлэлээн холонон көрөр уонна толкуйданар кыахтанар. Холобур, мин сөбүлүүр идэлэрим – баһаарынай уонна тиис бырааһа. Икки үөрэхтээх үлэһит буолуом этэ. Сахабыт сирин хас биирдии куората тэтимнээхтик сайдыан баҕарабын.
Чуев Вова, 7 №-дээх орто оскуола, Мииринэй.
Чурапчым туһугар сайдыам
Мин төрөөбүт дойдубун таптыыбын. Чурапчым айанын суола тупсан иһэр. Сахам сирин улуустарын, Чурапчы дэриэбинэлэрин суоллара эмиэ барыта аспаал буолуон баҕарабын.
Айан суола сайдыы бэлиэтэ дии саныыбын. Интернет түргэтээтэ, саҥа таас дьиэлэр тутуллан эрэллэр, ону көрөн үөрэбин! Улааттахпына улууһум баһылыга буолуохпун баҕарабын. Тыа сирин дьоно куоракка курдук үйэлээх дьиэҕэ олороллорун туһугар үлэлэһиэм, элбэх чааһынай таас дьиэ тутталларыгар көмөлөһүөм этэ. Хас биирдии ыал массыыналаах буолуохтарын баҕарабын. Ол туһугар үөрэхпэр кыһаллабын, элбэҕи ааҕабын. Чурапчым туһугар сайдабын.
Петров Уйгулаан, Төлөй орто оскуолата, Чурапчы.
Бэчээккэ бэлэмнээтилэр Нюргуяна Захарова, Дайаана Калининская
Худуоһунньук Дарья Тартакынова