От ыйын 7-13 күннэригэр Таатта улууһун Ытык Күөл сэлиэнньэтигэр успуорт саха төрүт көрүҥнэригэр 22-с «Манчаары оонньуулара» Спартакиада 7 тыһ. тахса кыттааччыны түмүөҕэ.
Бэс ыйын 20 күнүгэр Мэҥэ-Хаҥалас улууһуттан норуот дьоруойа Манчаары Баһылай төрөөбүт алааһыттан Арыылаах сириттэн «Манчаары оонньууларын» уотун эстафетата саҕаланар. Эстафета маршрута түөрт сүрүн хайысханан барар: Мэҥэ-Хаҥалас-Дьокуускай-Чурапчы-Таатта. Маршрут уопсай уһуна 765 км.
Бэс ыйын 28 күнүгэр уот Үс Хатыҥҥа Туймаада Ыһыаҕар «Дьулуруйар Ньургун Боотур» СӨ спордун Министиэристибэтин түһүлгэтигэр спортивнай-култуурунай былаһааккаҕа кэлэрэ күүтүллэр. Онтон бэс ыйын 29 күнүгэр уот эстафетата норуот таптаан көрөр «Дыгын оонньууларын» түмүктүүр түһүмэҕэр тиийиэҕэ.
Эстафетаҕа республика уһулуччулаах спортсменнара, тренердэр уонна общественнай деятеллэр кыттыыны ылыахтара: Дмитрий Горохов, СӨ физическэй култуураҕа уонна спортка үтүөлээх үлэһитэ, Дьааҥы оройуонун бочуоттаах гражданина, «Манчаары оонньууларын» уотун солбуллубат (2005, 2013, 2017, 2021 сс.) уонна да атын улахан күрэхтэһиилэр тэрийээччитэ уонна салайааччыта; Константин Жирков, мас тардыһыыга Арассыыйа спордун маастара (Мэҥэ-Хаҥалас), аан дойду чемпиона; Марфа Троева, чэпчэки атлетикаҕа Арассыыйа спордун маастара, бүтүн Арассыыйатааҕы турнирдар призера (Таатта); Гаврил Нохтунскай, СӨ үтүөлээх тренерэ, «Манчаары оонньууларын» хас да төгүллээх чемпиона, марафон сүүрүүгэ рекордсмен (Чурапчы); Татьяна Жиркова, Арассыыйа спордун үтүөлээх маастара (Мэҥэ-Хаҥалас).
Онтон Спартакиада аһыллыытын үөрүүлээх сиэрэ-туома от ыйын 8 күнүгэр Ытык Күөл сэлиэнньэтигэр «Дьулуруйар Ньургун Боотур» стадиоҥҥа буолар.
keskil14.ru