Үгэс быһыытынан, бастыҥтан бастыҥнар Дьокуускай куоракка Ил Дархан Харыйатыгар кыттыыны ылыахтара. Бу улахан тэрээһиҥҥэ биһиги оскуолабытыттан XI кылааc үөрэнээччитэ Люба Сергеева талаллан кыттыыны ылыаҕа. Кини «Инникигэ хардыы» научнай конференцияҕа, олимпиадаларга оскуолабыт чиэһин элбэхтэ көмүскээбитэ.
Люба алын сүһүөххэ үөрэнэ сылдьыаҕыттан лидер. Герой-пионер Сима Сергеев аатын сүгэр V-VIII кылаастар пионерскай хамсааһыннарыгар лидер этэ. Онтон улахан кылаастарга тахсыбытын биир санаанан быыбардаан оскуола лидерынан талбыттара.
Кини «Кэскил» оҕо бэчээтин кыһатын keskil14.ru саайтыгар биэрбит интервьютун манна ааҕыаххытын сөп: https://keskil14.ru/lider-oskuola-a-naadalaah-tu-alaah-ki-i/
Үөрэҕин таһынан «Иэйии» театральнай куруһуокка дьарыктанар. Элбэх ситиһиилээх. «4», «5» үөрэнэр.
Люба ылсыбыт дьыалатын тиһэҕэр тиэрдэр. Бары боппуруостарга иҥэн-тоҥон күүскэ ылсар уонна тиһэҕэр тиэрдэр. Волейболлуур, баскетболлуур.
Инникитин тылбаасчыт идэтин баһылыан баҕарар. Ол иһин БКЭ-гар общество уонна английскай тыл предметтэрин талла.
Ил Дархан Харыйатыгар барарын истэн олус үөрбүт, соһуйбут.
Оскуолабыт бастыҥ үөрэнээччитигэр, лидербитигэр ситиһиилэри баҕарабыт. Оскуолаҕа атаарар кэрэ кэмнэрин сырдык, ыраас буоллуннар! Иннин диэки үрдүк чыпчаалларга дьулуһан ис! Үүнэр саҥа сыл дьолу, ситиһиилэри тосхойдун, Люба!
Алена КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы