1990 сыл. Улуу Кыайыы 55 сыла. Ити кэмтэн ыла 36 сыл ааста. «Бэлэм буол» хаһыат 1990 сыл ыам ыйын 8 күнүнээҕи нүөмэрин бастакы балаһата, 36 да сыл ааспытын кэнниттэн, киһини долгутар, толкуйдатар, уйадытар дириҥ ис хоһоонноох.
Хаһыат бастакы балаһатыгар кырдьаҕас саллаат, тайах маска тирэнэн, Кыайыы болуоссатыгар турар хаартыската бэчээттэммит. Хаартыска анныгар маннык суруктаах:
«Ааспыт алдьархайдаах сэрии уот будулҕанын ортотунан ааспыт, бүгүҥҥү көҥүл олоҕу көмүскэспит кырдьаҕас саллаат Кыайыы площадыгар тайахха тэптэрэн кэлэн турар. Саллаат тугу санаан санньыйарый?
Санаан ылла дуу «суорак тириэтэй гуодтаахха» Старай Русса хаардаах толоонугар уҥа сототун өстөөх минатыгар быһа тэптэрэн хаанынан уста сыппытын, эбэтэр сырдык-хараҥа быыһынан уоттаах атаакаҕа киирэн иһэн өстөөх буулдьатыттан охтубут хаарыаннаах доҕотторо Вася Федоров, Сидор Стручков, Вася Иванов хараҕар элэҥнииллэр дуу?
Баҕар бүгүҥҥү дьалхааннаах олохпутуттан, кырдьаҕаска-кыаммакка кыһаммат буолбуппутуттан, кинилэр хааннарын тоҕон көмүскээбит тутулларын ситэ сыаналаабаппытыттан хараастара, санааргыыра дуу бу кырдьаҕас саллаат?»
***
Сарсын ыам ыйын 9 күнэ. Улуу Кыайыы 81 сылын бэлиэтиибит. Улуу Кыайыыны уһансыбыт эһэлэрбит, хос эһэлэрбит мэтириэттэрин тутан «Өлбөт үйэлээх полкаҕа» хаамыахпыт. Ол кэмҥэ эн 36 сыл аннараа өттүгэр Кыайыы болуоссатыгар тайахха тэптэрэн кэлэн турбут кырдаҕас саллаат тугу санаан санньыйбытын туһунан толкуйдаан ааһаар дуу…
кэскил14.ру