«Кырдьаҕаһы хааһахха сүгэ сылдьан сүбэлэт» диэн өбүгэ бэргэн этиитэ баар. Ол туһунан аныгы ыччат туох санаалааҕый?
Юра Третьяков, 9 кылаас:
Мин бу этиигэ дириң суолтаны көрөбүн. Бу өс хоһоонун билбэт буоллаххына: кырдьаҕас киһиттэн ыйыт диэн этэр. Тоҕо диэтэххэ, кырдьаҕас киһи, саастаах дьон мындыр өйдөөх, олус муударай буолаллар. Хас биирдии өс хоһоону суолтатын өйдөөн олоххо туһаныахха наада.
Сааскылаана Бубякина, 9 кылаас:
Бу эдэр көлүөнэҕэ анаммыт өс хоһооно. Кырдьаҕас киһи, биллэн турар, эдэр киһитээҕэр элбэҕи билбит, көрбүт буолар. Олоххо да көрүүтэ быдан атын. Кини эдэрдэр кыайан эппиэти булбат ыйытыыларыгар хоруйдуур кыахтаах. Ханнык да ыарахан кэмҥэр сүбэлээн-амалаан биэриэ. Быһаччы эттэххэ, «хаама сылдьар энциклопедия» буолар. Онон ытык дьоммутун харыстаан сүгэ сылдьыах тустаахпыт».
Эрхан Созонов, 10 кылаас:
Олоҕу олорбут киһи тылын иһит диэн ис хоһоонноох этии. Туох сыыһатын, туох сөбүн кини билэр. Онон өс хоһооно мээнэ айыллыбат, үөрэтэр суолталаах.
Арылхан Винокуров, 10 кылаас:
Кырдьаҕастары убаастыыр, харыстыыр эбээһинэстээхпит. Кинилэр уһуннук олорбут, элбэҕи ааспыт дьон олоҕу ис дьиҥин билбит муударай дьон буолаллар. Мин эбэм миигин сиэри-туому тутуһарга үөрэппитэ, үөрэтэр.
Игнат Винокуров, 10 кылаас:
Урут уруккуттан дьон кырдьаҕас дьону илдьэ сыддьан сүбэлэтэллэр этэ. Ханнык баҕарар ыарахан кэмҥэ кини сүбэтин-аматын ылан, ону тутуһан ыарахан кэмнэрин арыычча чэпчэкитик туорууллара. Кырдьаҕас дьонтон мин элбэхтэ сүбэлэппитим. Олус абыраабыттара, онуоха наһаа махтанабын.
Мирослав Винокуров, 10 кылаас:
Өбүгэбит этэн хаалларбыт дириҥ ис хоһоонноох өс хоһооно биһигини толкуйдатар күүстээх. Кырдьаҕас киһи төһө да кырдьан, мөлтөөн, кууран-хатан хааһахха да батар гына аччаатар, кини сүбэтэ-амата олус туһалаах, наадалаах буоларын өйдөтөр. Кинилэр биһигиннээҕэр уһуннук олорбут дьон олоҕу билэр буоллахтара. Кинилэр мындыр сүбэлэрэ олус наадалааҕын өйдөөннөр итинник бэргэн этии баар буолбут. Миигин эбэм ыраастык таҥнарга үөрэтэрэ. Оттон икки эһэлэрим булчут киһи тэрилэ хаһан баҕарар ыраас буолуохтаах диэн үөрэтэллэр. Үтүө сүбэни кулгаах таһынан аһарбакка, тутуһар ордук.
Дьэ, оҕолор маннык санаалаахтар эбит. Оттон эһиги бу өс хоһоонун хайдах өйдөөн ылынаҕыт?
И.Ноговицына
Өлөөкө Күөл, Орто Халыма