«Өркөн» оҕону эбии үөрэхтээһин киинигэр «Умсулҕан» коллекционердар түмсүүлэрин 30 сылыгар уонна Дьиэ кэргэн, Оҕо сылыгар аналлаах «Коллекция в чемодане», «Мин дьиэ кэргэним оонньуурдара» диэн оҕолорго аналлаах бэстибээл ыытылынна.
Тэрээһини улуустааҕы оҕо библиотекатын үлэһиттэрэ, коллекционердар түмсүүлэрэ тэрийдилэр. Манна улуус оскуолаларыттан элбэх оҕо кыттыыны ылла. Оҕолор ийэлэрин, аҕаларын, эбээлэрин, эһээлэрин оонньообут урукку оонньуурдарыттан саҕалаан билигин бэйэлэрэ оонньуу сылдьар киндер оонньуурдарыгар тиийэ мунньаллар эбит. Мин ордук Урсун уонна Уйгу Атласовтар коллекцияларын сөбүлээтим.
— Бу биһиги эбээлэрбит, эһээлэрбит, убайдарбыт, эдьиийдэрбит оонньообут оонньуурдарын аҕаллыбыт. Саамай былыргы оонньуурдар – өтүүк, орон, этирик. 1970 сыллардааҕы оонньуурдар буолуохтарын сөп. Биһиги таайбыт Иннокентий Дмитриевич – коллекционер. Кини нло туһунан араас информацияны хомуйар. Ыалбыт Станислав Николаевич – коллекционердар түмсүүлэрин салайааччы. Кини космонавтика туһунан хомуйар диэн Урсун, Уйгу Атласовтар кэпсээтилэр.
Бу курдук коллекциялары көрө сылдьан кубик рубиктардаах, чымадаан иһигэр мас оонньуурдардаах Сема Москвитины көрүстүм. Кини эбээлээх эһээтин кытта кэлбит. Эбээтэ Матрена Семеновна эмиэ коллекционер эбит. Кинилэр дьиэ кэргэн оонньообут оонньуурдарын аҕалбыттар. Оонньуурдарын чымадааҥҥа уган аҕалбыттар. Манна Семен ийэтэ оонньообут 1970-с сыллардааҕы куукулата, эһээлээх эбээтэ оҕо сылдьан оонньообут оонньуурдара, Семен пластилинтан оҥорбут оҥоһуктара, оонньообут массыыналара уонна кубик рубиктара бааллар.
Спартак Попов Бэйдиҥэттэн сылдьар. Кини коллекцията эмиэ ураты — 460 киндер оонньууру муспут. Саамай былыргылара бегемоттар, Маша уонна эһэ, роботтар бааллар. Спартак өссө открыткалары,таҥас этикеткаларын, кэмпиэт сууларын мунньар эбит. Киниэхэ анаан эһээтэ полкалаах чымадаан оҥорон биэрбит. Өссө да араас конкурстарга кыттыан баҕарар эбит. Коллекция кэпсии үөрэнэрбэр туһалаах диир.
Бастакы миэстэни ылбыт Милана Атласова Тулунаттан сылдьар. Ийэтин оҕо эрдэҕинээҕи 1974 сыллаах иистэнэр массыынатын аҕалбыт. Массыынанан куукуларыгар таҥас тигэр эбит. Өссө ийэтэ көрбүт диафильма баар, онно урут пленка уган мультик көрөллөр эбит. Саамай сыаннайа 1925 сыллааҕы манньыат баар.
Фестиваль тэрийээччитэ, «Умсулҕан» коллекционердар түмсүүлэрин чилиэнэ, улуустааҕы оҕо библиотекатын сэбиэдиссэйэ Вера Алексеевна Портнягина:
— VII улуустааҕы бэстибээлгэ 7 оскуолаттан 21 оҕо кытынна. Кулун тутар 27 күнэ олус суолталаах. 30 сыл анараа өттүгэр бу күн «Өркөҥҥө» аан бастакы коллекционердар быыстапкалара буолбута. Бу бэстибээл 1996 сылтан оҕолорго анаан ыытыллар. Сылын аайы каникул кэмигэр ыытыллар. Коллекция диэн олус үчүгэй дьарык, оҕо элбэҕи билэр, элбэххэ үөрэнэр. Онон эһиилги быыстапкаҕа коллекцияларын өссө хаҥатан, элбэҕи мунньан, хасыһан, билэн кэлэргитигэр ыҥырабын.
Ивалина ДОМОТОВА,
VI кылаас,
“Өркөн” оҕону эбии үөрэхтээһин пресс-киинэ,
Уус Алдан