Сайыҥҥы сынньалаҥ кэмигэр ханнык баҕарар оҕо интэриэһинэй, туһалаах лааҕырга сылдьыан баҕарарын туһунан ыралыыр. Мин эмиэ үүнэ-сайда, саҥаны билэ, саҥа доҕоттордоно лааҕырга барыахпын баҕарар этим. Ол ыра санаам быйыл сайын туолар буолла! Приморскай кыраайга «Алые паруса» Бүтүн Арассыйатааҕы лааҕырга барар чиэскэ тиксэммин үөрэ сылдьабын.
«Алые паруса» лааҕырга көхтөөх, үөрэххэ кыһамньылаах, ситиһиилэрдээх оҕолору талан ылаллар. Быйылгы үөрэх дьылыгар кэккэ ситиһиилэрдээхпин. «Инникигэ хардыы», улуустааҕы НПК-ҕа лауреат үрдүк аатын ылбытым, олимпиадаларга кыттыбытым. Театральнай куруһуокка сөбүлээн сылдьабын , улууска, өрөспүүблүкэҕэ элбэх ситиһиилээхпит, улуустааҕы «Экоплей» куонкуруска «Лучшая женская роль» бэлиэ хаһаайката буолбутум. Ону таһынан спордунан дьарыктанабын, илиибинэн араас оҥоһуктары оҥороммун быыстапкаларга кыттабын.
«Кэскил»медиа оскуола эдэр корреспонденабын. Ыстатыйаларым «Кэскил» оҕо бэчээтин кыһатын саайтыгар тахсаллар. Бу күннэргэ биһиги «Кэскилгэ» кэлэммит үөрэннибит.
«Кэскил» куратордара элбэххэ үөрэттилэр. Быйыл биһиги «Сэрии тыыннаах куоластара» диэн ааттаах документальнай киинэ устаары сылдьабыт. Бу үөрэммиппит онно улахан көмө буолуо диэн эрэнэбин. «Кэскил» куратордарыгар интэриэһинэй дьарыктарын, сүбэлэрин иһин махтанабын.
Көхтөөх киһи ситиһиилээх буолар эбит. Бу ситиһиилэрбинэн ыра санаабын толорон, Бүтүн Арассыыйатааҕы «Алые паруса» лааҕырга бараары сылдьарбыттан олус үөрэбин, барар күммүн кэтэһэбин аҕай.
Үөрэххэ кыһаллар, барыга көхтөөх буоллахха, уруккуттан иитиэхтии сылдьыбыт баҕа санааларгыт туолуохтарын сөп эбит. Эһиги эмиэ үчүгэйдик үөрэнин, дьарыктанын, элбэх ситиһиилэнин, барыга бары көхтөөх буолуҥ!
Алена НОЕВА, VIII кылаас,
С.Д. Флегонтов аатынан Хадаар орто оскуолата, Чурапчы