Биһиги оскуолабытыгар «Юный исследователь» куруһуок үлэлиир. Салайааччы Анисимова Марина Филипповна. Куруһуокка элбэх оҕо дьарыктанар. Араас элбэх конференцияларга, куонкурустарга ситиһиилээхтик кыттабыт. Чинчийэр үлэнэн эрэ буолбакка хоһоон ааҕарга, ыстатыйа суруйарга кытта холонобут.
Бүгүн Чукаар нэһилиэгин олохтооҕо Тихонова Неолия Николаевна туһунан кэпсиэхпин баҕарабын.
Кини хаһыаты кытта ыкса сибээс олохтообут киһи дии саныыбын. Сыл ахсын биһиги оскуолабытыгар төгүрүк биир сыллаах сурутуу бэлэхтиир үгэстээх. Ону элбэх оҕолоох ыалларга аныыллар. Бу үтүө дьыалатын 50 сааһын туолбут үбүлүөйүн күнүгэр анаабыт эбит. Билигин 66 саастаах, 16 сыл устата сыл ахсын оҕолорго туһалаах буоллун диэн сурутууну бэлэх уунар. Неолия Николаевна үүнэр көлүөнэ, кэнчээри ыччакка сырдыгы, ырааһы, кэрэни-үтүөнү баҕаран ис сүрэҕиттэн аныыр. Оҕолор кыра саастарыттан элбэҕи ааҕан, билэн-көрөн, сайдыылаах, ситиһиилээх, төрөөбүт дойдуларын таптыыр, бэриниилээх дьон буолуохтара диэн эрэнэр. «Махтал тыллары элбэҕи истибитим, ол наһаа санаабын көтөҕөр, дуоһуйа үөрэбин. Төрөппүттэр үөрэн-көтөн махтаммыттара кулгаахпар билигин да иһиллэр» — диэн кэпсиир.
Неолия Николаевна быйылгы бэлэҕэ биһиги дьиэ кэргэҥҥэ анаммыта. Наһаа үөрдүбүт. Төрөөбүт дойду туһунан суруйуум «Кэскил» хаһыакка бэчээттэммититтэн үөрбүтүм, дьолломмутум, хаһыат кэлэрин олус күүтэбин.
Түгэнинэн туһанан, үтүөкэннээх киһиэхэ Неолия Николаевнаҕа ис сүрэхпиттэн махтанабын. Бу сиргэ баар кэрэни, үтүөнү баҕарабын!
Күннэйэ Куо ЯКОВЛЕВА,
V кылаас,
Чуукаар орто оскуолата,
Ньурба