Ааспыт ыйга Э.К. Пекарскай аатынан Игидэй орто оскуолатыгар улуустааҕы WorldSkills чемпионат түөрт компетенциянан буолан ааста. «Промышленный дизайн», «интернет вещей», «лазерные работы», «фотография» компетенцияларга улууспут аҕыс оскуолатыттан отут оҕо кэлэн күрэхтэстэ.
Тааттатааҕы WorldSkills күрэхтэһии иккис сылын сүрдээх тэрээһиннээхтик, Игидэй оскуолатын саӊа дьиэтигэр ыытылынна. Маннык улуустааҕы күрэхтэһиилэри оскуолаҕа тэрийии World Skills күрэхтэһии арыйар аанынан буолла. Күрэхтэһии аһыллыытыгар Ытык Күөл 1-кы нүөмэрдээх оскуолата, Тааттатааҕы техническай лицей, Гимназия, Чычымах, Уус-Таатта, Туора Күөл, Игидэй оскуолаларын уонна «Сатабыл» оҕо кииниттэн кэлбит хамаандалар параадтара буолла.
«Сатабыл» Оҕо айымньытын директора, күрэх координатора Алгыстаана Сырдык-Ай чемпионат кыттыылаахтарын эҕэрдэлээтэ. Иккис сылын ыытыллар тэрээһиӊӊэ быйыл 38 компетенциянан күрэхтэһии ыытылларын эттэ. Былырыын 42 компетенциянан ыытыллыбыт эбит.
«Точка роста» национальнай бырайыакка Игидэй оскуолата киирбитинэн эҕэрдэлээтэ. Оскуолабыт Таатта улууһугар ыытыллар күрэхтэһиилэргэ буолбакка, республикаҕа, Россияҕа тиийэ ситиһиилэммит оҕолордоохпутун бэлиэтээн эттэ. IT — технологияҕа бастакытын маннык тэрээһини ыытаӊӊыт, өссө да үгүс элбэх араас күрэхтэһиилэри, араас үчүгэй тэрээһиннэри ыытар сүрүн тирэх оскуола буолун диэн баҕа санаатын биллэрдэ. Бу күрэхтэһииттэн тирэх ылан кыайыылаах оҕолор республиканскай World Skills күрэхтэһиигэ кыттыахтара.
Игидэй орто оскуолатын 11 кылааһын үөрэнээччитэ Артем Бойтунов «Сосновай борга» Кампус молодежных инноваций «Цифровое поколение» сезонугар ыытыллыбыт IT- хамаандалар, студиялар, саӊа технологиялары сэӊээрэр оҕолорго аналлаах күрэхтэһиигэ бастыӊнар кэккэлэригэр ааттанна уонна Саха сирин «Майтона» IT- компания аатыттан 10 000 сертификат тутта.
Оскуолабыт директора Иннокентий Дягилев, улуустааҕы үөрэх управлениятыттан Мира Луковцева күрэхтэһии кыттыылаахтарын эҕэрдэлээтилэр.
Мира Николаевна: «Республикаҕа ахсыс төгүл ыытыллар, биһиги улууспутугар иккис төгүлүн ыытыллар тэрээһин диэн эттэ. «Точка роста» киин быйыл 11 площадкаҕа күрэхтэһии ыытылларыгар баҕатын биллэрбитэ, түөрт компетенциянан манна буолуо. Улууспутугар араас тэрилтэлэринэн, холобур Ветстанциянан, Харбалаах образовательнай площадканан кыттыы буолуо. Барыта 400 оҕо кыттыаҕа, быйыл эбии юниордарга өссө кыра саастаах оҕолорго группа арыйдыбыт. Элбэх хаачыстыбалаах кыттааччыларга баҕарабыт. Идэни талыыга оҕоҕо үчүгэй хамсааһын. Билэрбит курдук, А. Боппосов республикаҕа бастаан Россияҕа ситиһиилээхтик кыттыбыта. Кини 9-с кылаас кэннэ колледжка үөрэнэ киирдэ. Онон идэни талыныыга олус туһалаах күрэхтэһии. Күрэхтэһиинэн эрэ муӊурданан хаалбакка, үчүгэй баазалаах оскуолаларга кэлэн, каникул кэмигэр үлэни, үөрэҕи тохтоппокко дьарыктанаргытыгар баҕарабыт. Ким бэлэмнээх кыайдын. Өссө да үүнэ-сайда туруҥ», — диэн этиитин түмүктүүр.
Түмүккэ Игидэй орто оскуолатын аатыттан кыттыбыт үөрэнээччилэр үс компетенцияҕа барытыгар бастаатылар. Фотографированиеҕа иккис буоллулар.
Ааптар: Гизелла Попова, педагог-библиотекарь, Игидэй