Хас биирдии үрдүкү кылаас үөрэнээччитин: “Ханнык үөрэххэ туттарсабын, ханнык идэ миэхэ сөп түбэhэрий?”- диэн боппуруостар үүйэ-хаайа туталлара саарбаҕа суох. Идэни талыы киhи олоҕор олус эппиэтинэстээх кэм буолар. Бу олохпутун быһаарар кэмҥэ аҕа дьоммут сүбэтэ-амата олус суолталаах буолар.
Итинник санаанан салайтаран, X, XI кылаас оҕолоро күһүҥҥү каникулбут бириэмэтигэр учууталларбыт Алина Семеновна уонна Ульяна Николаевна салалтатынан Дьокуускай куоракка киэҥ бырагыраамалаах айаҥҥа сырыттыбыт.
Бастакы күммүтүгэр айаннаан тиийэн, соторутааҕыта арыллыбыт саҥа технологияларынан баай смарт-бибилэтиэкэҕэ сылдьан, ааҕааччы дьарыктанарыгар, сынньанарыгар олус табыгастааҕын бэлиэтээтибит, “Устудьуон буоллахпытына, манна эргиллиэхпит”, — дэстибит.
Салгыы биир дойдулаахпыт Елена Кычкина «English as a second language» английскай оскуолатыгар ыалдьыттаатыбыт. Елена Афанасьевна үөрүнньэҥ аһаҕас, аламаҕай дууhатынан, киэҥ билиитинэн, күүстээх санаатынан, дьулуурунан биhигини абылаата.
Олус сыаналаах сүбэлэри биэрдэ: бэйэбит дууhабыт сүрэхпит сөбүлүүр, санаабыт сытар идэтин талыахтаахпытын, ол эрээри, хаhан баҕарар, атын үлэни баһылыыр син эбит. Билиҥҥи кэмҥэ омук тылын билии олох ирдэбилэ буолбутун, ханнык баҕарар үлэҕэ наадатын туһунан бэйэтин холобуругар кэпсээн итэҕэттэ. Бэйэ бизнеhин үлэлэтэр олус эппиэтинэстээҕин, судаарыстыба ирдэбилин барытын тутуhан үлэлэтэр эрэ буоллахха, суобаскар да үчүгэйин, бизнеhин да сайдарын өйдөттө.
Уонна саамай долгутуулааҕа уонна интэриэhинэйэ ыраах Америкаттан үлэлии кэлбит учууталы кытта ангылычаанныы кэпсэттибит, хаартыскаҕа тустубут.
Биhиги оскуолабыт бибилэтиэкэтигэр баар «Кругосветное путешествие якутских автоледи» диэн кинигэ мин болҕомтобун өрүү тардар, интэриэһиргэтэр. Саха дьахталлара массыынанан 80 күн иһигэр сир шарын эргийбиттэрэ киhини сөхтөрөр. Дьэ, бу кинигэ автора Лена Матвеевна Баишева наhаа кыраhыабай квартиратыгар биhигини барыбытын ыалдьыттатта. Баай астаах остуол тула олорон, истиҥ иhирэх кэпсэтии таҕыста. Лена Матвеевна Илбэнэҕэ ааспыт оҕо сааhын, баай ис хоhоонноох олоҕун суолун кэпсээтэ, сыаналаах сүбэлэри биэрдэ. Киhи кыаҕа муҥура суоҕун бэйэтин холобурунан дакааастаабыт Лена Матвеевнаҕа махталбыт муҥура суох.
Киэһэтин «Синема» кинотеатрга бары сөбүлүүр «Малефисента» киинэбит иккис чааһын көрөн астынныбыт.
СВФУ – эдэр ыччат баҕа санаата, үрдүк үөрэх чыпчаала. Иккис күммүтүгэр эмиэ биhиги биир дойдулаахпыт, ИТФ деканын солбуйааччы Екатерина Архангельская университеты кытта билсиhиннэрдэ. Екатерина Афанасьевна билиҥҥи кэмҥэ информатика, программирование, омук тыла олус наадалааҕын тоhоҕолоото, элбэх сүбэни биэрдэ, университет туһунан сиhилии кэпсээтэ. Көрсүһүүгэ юридическай, техническэй, омук тылын институттарын бэрэстэбиитэллэрэ бэйэлэрин кыһаларын туhунан олус сэргэхтик кэпсээн бардылар.
Онтон инженернай-техническэй, биолого-географическай институттар баай лабораторияларыгар сөҕө-махтайа экскурсиялаатыбыт. Маны таhынан, математика уонна информатика институгар сырыттыбыт. Киин сиртэн биhиги университеппыт хаалсыбат сайдыылааҕын көрөн итэҕэйдибит. Екатерина Афанасьевна университет туhунан толору кэпсиир кинигэни бэлэх уунна.
Бу икки күн биhиги олохпутугар олус суолталаах буолла: ким эрэ ханнык үөрэҕи таларын буккулла сылдьыбыт буоллаҕына, билигин чопчу быhаарынна.
Биhиги олоххо сөптөөх суолу булан, бу биhиги биир дойдулаахтарбыт Елена Афанасьевна, Лена Матвеевна, Екатерина Афанасьевна курдук ситиhиилээх дьон буолар баҕа санаа үөскээтэ. “Эмиэ кинилэр курдук үөрэммит оскуолабыт оҕолоругар олоххо сөптөөх суолу тутуhалларыгар көмөлөһөр кыахтаах, киэҥ аhаҕас дууhалаах дьон буола сайдыбыт киhи” — диэн баҕа санаа үөскээтэ.
Ааптар: Зоя Иванова, XI кылаас,
«Көмүс бөрүө» пресс-киин. Илбэҥэ, Бүлүү.