Саха сирэ урут-уруккуттан Арассыыйаны кытта улахан историческай, культурнай уонна социальнай-экономическай ситимнэринэн сибээстээх. Арассыыйа норуоттара биһиги республикабыт үөрэҕириитин, култууратын, ускуустубатын уонна норуотун хаһаайыстыбатын сайыннарыыга улахан көмөнү оҥорбута. 70-с сылларга тыа сиригэр тутууга элбэх киһи кэлэн норуот хаһаайыстыбата сайдарыгар кылааттарын киллэрбиттэрэ. Кинилэртэн биирдэстэрэ биһиги хос эһэбит Николай Владимирович Романятов буолар.
Кини туһунан мин хос эһэм кыыһыттан, эдьиийбиттэн Римма Николаевна Романятоваттан, ыйыталастым.
Хос эһэм Николай Владимирович 1942 с. Беларусь өрөспүүбүлүкэтигэр Могилевскай уобаласка Верховцы дэриэбинэҕэ Анастасия уонна Владимир Романятовтар дьиэ кэргэттэригэр төрөөбүт. Бииргэ төрөөбүттэр үстэр эбит. Оҕо сааһа Аҕа дойду Улуу сэриитин кэмигэр ааспыт, ол ыар сыллар тустарынан хаһан да кэпсээбэтэҕэ үһү.
Оскуоланы бүтэрэн баран Кемеровскай уобаласка тутуу техникумугар үөрэммит. Онтон Саха сиригэр ананан үлэлии кэлбит. Үөһээ Бүлүүгэ МСО-ҕа тутуу биригээдэтигэр үлэҕэ ылбыттар. Салгыы Дүллүкүгэ кэлэн үлэлээбит. Иллэҥ кэмигэр эһэм өрүскэ киирэн балыктыырын олус сөбүлүүр эбит. Биирдэ күөгүлүү сылдьан илиитигэр күрүчүөк киллэрэн кэбиспит. Балыыһаҕа ыллара барбыт. Онно икки эдэр сиэстэрэ баар эбит, биирэ мин хос эбэм. Күрүчүөгү сатаан ылбатахтар. Эһэм ыарыытыттан уонна саллан куотан тахсыбыт. Кэлин кэлэн ыллаттарбыт. Ити курдук хос эбэбин Мария Филипповнаны кытта билсибиттэр, ыал буолан элбэх оҕоломмуттар.
Эһэм Николай Владимирович Дүллүкүгэ билигин үлэлии турар оскуоланы, кулуубу, оҕо уһуйаанын, почтаны, хонтуора дьиэтин уонна ферма хотоннорун тутуспут.
Кини киэҥ-холку майгылаах, дьоҥҥо эйэҕэс сыһыаннаах, үлэһит киһи эбит. Саха сирин сөбүлээн олохсуйан, норуот хаһаайыстыбата сайдарыгар күүһүн- уоҕун ууран үлэлээбит күндү киһибитин оҕолоро, сиэннэрэ, хос сиэннэрэ умнубаппыт.
Карина Новгородова, VI кылаас, «Эрчим» медиакиин, Дүллүкү орто оскуолата, Үөһээ Бүлүү