Быйылгы үөрэх дьылыгар Парфений Никитич уонна Надежда Евменьевна учуутал Самсоновтар ааттарын сүгэр Хатастааҕы агробиисинэс орто оскуола 140 маҥнайгы кылааска киирэр үөрэнээччилэри үөрэ-көтө көрүстэ. Барыта бу саҥа үөрэх дьылыгар оскуола 952 үөрэнээччилээх, онтон 31-дэ — оскуоланы бүтэрээччилэр. Дирэктэринэн Николай Владимирович Слепцов үлэлиир.
2019 сыллаахтан Хатастааҕы агрооскуола иһинэн арыллыбыт «Агрокуб» диэн федеральнай үөрэх уонна билим лабораторията ситиһиилээхтик үлэлиир. Бу Уһук Илин эрэгэйиэҥҥэ соҕотох лаборатория буолар, онтон маннык хайысхалаах кылаас Арассыыйа үрдүнэн сэттэ эрэ оскуолаҕа баара биллэр. Ол иһигэр биһиги Хатастааҕы орто агрооскуолабытыгар!
Хатастааҕы агрооскуола Арассыыйа Үөрэҕин министиэристибэтин гранын ситиһиилээхтик көмүскээн уонна кыайан бу үөрэх уонна билим лабораториятын арынан номнуо кэккэ ситиһиилэрдээх. Ол курдук Арктикатааҕы агротехнологическай университетка бу быйылгы үөрэххэ киирии түмүгүнэн Хатастааҕы агрохайысхалаах орто оскуола бастыҥнар ааттарыгар ааттанна.
П.Н. уонна Н.Е.Самсоновтар ааттарынан агрохайысхалаах Хатастааҕы орто оскуола агротехнологическэй хайысхаҕа дириэктэри солбуйааччы Диана Дмитриевна Васильева кэпсиир:
— Манна оҕолор естественно-научнай уонна технологическай хайысхаларга дьарыктаналлар. Ол эбэтэр биотехнология, агробиотехнология, робототехника өттүнэн араас куруһуоктар үлэлииллэр. «Агрокуб» иһинэн биһиги өрөспүүбүлүкэ таһымнаах тэрээһиннэри, күрэхтэһиилэри тэрийэн ыытабыт. Бу 2019 сылтан, лабораториябыт үлэлиэҕиттэн, биһиги оскуолабытыгар быйыл онус профильнай кылаастар арылыннылар. Наука сылын чэрчитинэн аан бастакытын научно-естественнэй хайысхалаах кылаас арылынна. Онно сүүмэрдээһин түмүгүнэн уопсайа 24 оҕо үөрэнэ киирдэ.
Билии күнүгэр үөрүүлээх линейкаҕа биһиги оскуолабытыгар Арктикатааҕы агротехнологическай университет ректорын эбээһинэһин толорооччу Константин Константинович Кривошапкин кэлэн саҥа арыллыбыт научно-естественнай хайысхалаах кылаас үөрэнээччилэригэр олус интэриэһинэй лекция аахта, маастар-кылаас ыытта, оҕолору кытары кэпсэттэ.
Быйыл АГАТУ-га үөрэххэ киирии түмүгүнэн өрөспүүбүлүкэ агрохайысхалаах оскуолалартан Хатастааҕы агрооскуолаттан саамай элбэх оҕо үөрэххэ киирбитин туһунан үөрүүлээх сонуну иһитиннэрдэ. Инникитин өссө да элбэх былаан баарын уонна бииргэ үлэлэһэр туһунан бигэ санаатын тиэртэ. Маны таһынан Константин Константинович биһиги оскуолабытыгар үүнээйилэри ууһатар сир (питомник) арылларын туһунан эттэ уонна бастакы 5 үүннэрии маһы олордор сертификаты туттарда. Маны таһынан үөрүүлээх линейкабытыгар Хатас нэһилиэгин дьаһалтатын МКУ салайааччытын солбуйааччыта, бэйэбит оскуолабытын бүтэрээччи Василий Егорович Пинигин, Дьокуускай куорат Дууматын депутата Прасковья Афанасьевна Козлова кэлэн эҕэрдэ тылын эттилэр.
Саҥа үөрэх дьыла саҕаламмытынан оҕолору, учууталлары, төрөппүттэри оскуолабыт аатыттан эҕэрдэлиибит. Ситиһиилээх, үрдүк көрдөрүүлээх саҥа үөрэх дьылын баҕара хаалабыт.
Кэпсэттэ Анна СЛЕПЦОВА.