«Чыпчаал» — Горнай улууһугар бастыҥ көрдөрүүлээхтэри түмэр кинигэ. 2000 сылтан саҕалаан тиһигин быспакка тахсар. Ааптар —Василий Ильич Алексеев.
2017 сыл
- Маҥаны ыччата Геннадий Степанов спортивнай хаамыыга өрөспүүбүлүкэ бастакы рекордун олохтообута. Үс километрдаах сири 13 мүн. 44 сөк. хааман кэлбитэ.
- Одуну уола Дьулустаан Ноговицын «Дыгын оонньууларыгар» 120 киилэ ыйааһыннаах тааһы көтөҕүүгэ Саха сирин рекордун иккистээн олохтообута. Кини бу тааһы 203 миэтэрэ 50 см. көтөҕөн илдьибитэ.
2018 сыл
- Горнай улууһун киэн туттар ыччаттара, спортсменнара Марианна Кожеваткина, Аяна Эверстова, Иван Ксенофонтов хотугу многоборьеҕа «Саха өрөспүүбүлүкэтин спордун маастара» диэн үрдүк ааты туппуттара. Онон Горнай улууһа биир күн үс спорт маастардана түспүтэ.
2019 сыл
- Горнай улууһун эдэр спортсмена Россия, Европа, Аан дойду чемпиона, VII кылаас үөрэнээччитэ Тунаара Федорова 100 харахтаах дуобакка «молниеноснай» программаҕа кыайыылааҕынан буолбута. Кэннигэр 39 күүстээх дуобатчыттары, ол иһигэр алта гроссмейстеры хаалларбыта. Горнай кыыһа бу ситиһиитинэн дуобат историятыгар саамай эдэр чемпионка быһыытынан ааттаммыта.