Эбэм Елена Сергеевна Ильина 1977-1983 сс. Саха государственнай университетын математикаҕа факультетын бастакы выпускнига.
Эбэм Елена Сергеевна устудьуоннаабыт сылларын маннык ахтар:
— Устудьуоннаабыт сылым олоҕум биир умнуллубат кэрэ кэмэ буолар. Ол кэмнэргэ тутуу этэрээтигэр сылдьыбатах буоллаххына, устудьуон биир ураты өйдөнөр кэмнэрин билбэккин дииллэрэ. Кыргыттар сүбэлэһэн баран, «Аартык-78», «Аартык-79» тутар этэрээти тэриммиппит. Мин икки сыл этэрээт хамандыырынан талыллан үлэлээбитим. Бастакы сылбытыгар университет сүрүн куорпуһун өрөмүөнэ (устукатуурка, кырааска), иккис сылбытыгар Депутатскайга 5 миэтэрэ үрдүктээх гарааһы устукатууркалаабыппыт. Ону таһынан, баҕа өттүбүтүнэн, олохтоох оскуола өрөмүөнүгэр үлэлээбиппит. Биһигини кытта ити кэмҥэ литовецтар тутар этэрээттэрэ баара, кинилэри кытта холбоһуктаах кэнсиэр туруоран, нэһилиэнньэ олохтоохторуттан махтал ылбыппыт.
Устудьуоннар тутар этэрээттэрин икки ардыларыгар бастыҥнар ааттарыгар ааттанан бастакы сылбытыгар Лена очуостарыгар, иккис сылбытыгар 7 устудьуон буолан босхо путёвканан Монголия сиригэр-уотугар күүлэйдээбиппит, өйбүтүттэн-санаабытыттан сүппэт. Тутар этэрээти оччотооҕуга өрөспүүбүлүкэ үрдүнэн Юрий Николаевич Буслаев, онтон университет тутар этэрээтин Артём Пантелеймонович Слепцов сатабыллаахтык, таһаарыылаахтык салайан олорбуттара умнуллубат. Биһиги факультет коммунистическай субботниктарга саамай көхтөөх факультет аатын ылар этибит. Елена Сергеевна Ильина Ороһу оскуолатыгар математика учууталынан үрдүк таһаарыылаахтык үлэлии сылдьарыттан киэн туттабын.
Николай Крылатов, Ороһу.