Саха Өрөспүүбүлүкэтин Саҥа технологияларын института сыл аайы тэрийэн ыытар «Эдэр чинчийээччи» научнай-чинчийэр конференцията 12-с төгүлүн үгэс курдук олунньу 6 күнүгэр быһа холбонуу нөҥүө ыытылынна. Быйылгы конференция сүрүн тиэмэтэ «Улуу Кыайыы 80 сылыгар» ананна. Кыттааччылар кылааһынан үс бөлөххө арахсан үлэлэрин кэпсээтилэр, боппуруостарга эппиэттээн көмүскээтилэр.
Анатолий Малышев, Чычымах орто оскуолатын 11 кылааһын үөрэнээччитэ, «Эллэй Кыайыыга кынаттаабыт хоһоонноро»диэн тиэмэнэн кытынна. Толя салайааччыларынан, ИНТ эбии үөрэхтээһин учуутала В.В. Шарина, саха тылын, литературатын учуутала В.С. Кривошапкина, технология учуутала О.К. Чурукова 9-11кылаастар бөлөхтөрүгэр 9 кыттааччы үлэлэрин кэпсээтилэр, дьүүллүүр сүбэ иннигэр көмүскээтилэр, араас бэриллибит боппуруоска эппиэттээтилэр. Толя Малышев дьүүллүүр сүбэ хайҕабылын ылан, бочуоттаах иккис миэстэ буолла.
Анатолий бу НПК-ҕа хаһыс да төгүлүн ситимнээхтик уона ситиһиилээхтик кыттар. Ол курдук, бастакы сылларыгар камераттан толлор, атын дьон миигин көрөр эбит диэн симиттэр эбит буоллаҕына, быйыл олус дуоспуруннаахтык, бэйэтигэр эрэллээхтик кытынна. Дьүүллүүр сүбэ элбэх боппуруос биэрэн араастаан тургутан көрдө, булугас өйдөөх уол чинчийбит билиитигэр олоҕуран сөптөөх хоруйу тобулла.
Тэрийээччилэр оҕо кыаҕын учуоттаан миэстэтигэр, кэтэхтэн, быһа холбонон форматтаах тэрийбиттэрэ олус табыгастаах. Кыттааччылар тиэмэлэрэ араас хабааннаах, оҕолор кыһаллан туран кыттыбыттара кэрэхсэбиллээх.
Үөрэтэр оҕобун ситиһиитинэн эҕэрдэлиибин, өссө да үөрэх-билии киэҥ аартыга арыллан истин!
Василена Шарина, эбии үөрэхтээһин учуутала,
СӨ Саҥа технологияларын института.
Дьокуускай к.
keskil14.ru