Ютуб ханаалга “Игирэчээс кулунчуктар” диэн мультик тахсыбыта 5 ый буолла. Бу мультигы убайдыы бырааттыы Дуолан уонна Айсен Лугиновтар оҥороллор. Соторутааҕыта мультик 5 сиэрийэтэ “Кинигэ ааҕабыт” диэн ааттанан “Бичик” кинигэ кыһатын өйөөһүнүнэн таҕыста. Бүгүн, балаҕан ыйын 19 күнүгэр, @bichik.ru Инстаграм сирэйигэр Дуолан уонна Айсен быһа эфирга тахса сырыттылар.
Быһа эфиргэ убайдыы бырааттыы Лугиновтар мультик оҥорон таһаарыы үлэтин уонна инники былааннарын туһунан кэпсээтилэр.
Дуолан Лугинов:
— Биһиги дьиэ кэргэн Дьокуускайтан Сербияҕа көһөн кэлбиппит 5 сыл буолла. Мин Дьокуускай 12 №-дээх оскуолатын бүтэрбитим. Быраатым Айсен билигин графическай оскуолаҕа үөрэнэр. Бырааппын кытта биисинэс, урбаан туһунан элбэҕи толкуйдуубут. Канадаҕа бара сылдьан, дьон олоҕо чыҥха атын, олохторун таһыма үрдүгүн көрөн, өссө күүскэ үлэлиир, айар санаам киирбитэ. Бастаан 2D анимацияны үөрэтэн, аҕыйах тэрилтэҕэ реклама оҥорорго холонон көрбүппүт. Онтон Ютуб ханаалга урбаанньыттар тустарынан устан угарбыт. Ол эрээри үчүгэйдик табыллыбатаҕа. Онтон ийэбит сахалыы мультик оҥорон холонон көрөргө идиэйэ уган биэрбитэ.
Оҕолорго аналлаах хаачыстыбалаах сахалыы мультиктар суохтар, ол иһин оҕо нуучча, ангылычаан тыллаах мультиктары көрөр. Оҕоҕо 2-5 сааһыгар диэри саха тылын үөрэтэр, иҥэрэр наада дии саныыбын. Төрөөбүт тылын билэр оҕо өйө-санаата, толкуйа атыттартан үрдүк уонна атын буолар.
«Мультикпытын хайдах оҥоробут» диэн санаа киирбитэ. Аан дойдуга биллибит “Свинка Пеппа” мультик анимациятын көрөн баран,”биһиги да манныгы сатыахпытын сөп эбит” дии санаабыппыт.
Сценарий суруйарбытыгар ийэбит көмөлөһөр, иллюстрацияны аймах кыыспыт Августина Семенова уруһуйдуур, персонажтарбытын киинэ уонна тыйаатыр артыыһа Гаврил Менкяров дьиэ кэргэнэ саҥардаллар. Мультик оҥоһуллан тахсарыгар спонсор көрдүүр олус ыарахан, улахан тэрилтэлэргэ сурук ыыталыыбыт, хомойуох иһин, эппиэт аҕыйах. 4 сиэрийэбит “Skintime” уонна “Зеленый город” тэрилтэ салайаачччыта Ирина Матвеева өйөөһүнүнэн оҥорбуппут. Ирина Матвееваҕа улахан махталбытын тиэрдэбит. 5 сиэрийэбит иһин “Бичик”кинигэ кыһатыгар эмиэ улахан махталбытын тиэрдэбит.
Дуолан Лугинов оскуолаҕа үөрэнэр кэмигэр «Кэскил» хаһыат биир бастыҥ эдэр кэрэспэдьиэнэ буолара. Дьокуускай 12 №-дээх оскуолатын учууталын Клара Борисовна Ксенофонтова салалтатынан элбэх куонкурустарбытыгар кыттан, үчүгэй үлэтинэн өрүү бириистээх миэстэни ылара.
Билигин 3D персонажтары оҥорорго кууруска үөрэнэ сылдьабыт. 1-2 сылынан 3D персонажтаах мультиктары оҥоруохпут. Инникитин Disney, Pixar курдук улахан хампаанньалары кытта тэҥҥэ турар буолуохпутун баҕарабыт. Ол туһугар элбэххэ үөрэнэ, сайда сатыыбыт.
“Игирэчээс кулунчуктар” Ютуб ханаалбытыгар билигин 500 кэриҥэ көрөөччүлээхпит. Биһиги мультикпытын көрүҥ, сэргээн, санааларгытын үллэстиҥ. 1-2 сиэрийэбитин уонна бүтэһикпитин тэҥнээн көрдөххө тупсубут, хаачыстыбата үрдээбит. Көрөөччүлэрбит санааларын, сүбэлэрин ылынан, мультикпытын өссө сайыннаран, тупсаран иһиэхпит.
Эфиры “Бичик” кинигэ кыһатын PR-менеджерэ Вилюяна Никитина ыытта.
Айыына Трофимова keskil14.ru