Оскуолабытыгар Ленинград куорат блокадаттан босхолонуутугар аналлаах дойду үрдүнэн ыытылла турар «Блокада хара килиэбэ» диэн ааксыйаҕа аналлаах тэрээһин ыытылынна.
900 күннээх Ленинград төгүрүктээһинтэн төлөрүйүүтүгэр аналлаах кэриэстэбил линейканы Оҕо хамсааһынын баһаатайа Светлана Ноговицына арыйда. Сэрии кэмин оҕото, оскуолабыт библиотекара Розалия Андреевна Чирикова кэпсээнин: “Ленинград куораттан күн бэҕэһээ үөрэнээччим эрийэ сырытта”, — диэн саҕалаата.
Учууталбыт кэпсээнин биир тылы сыыс түһэрбэккэ, болҕойон иһиттибит. 34 саха эдэркээн ыччата артыыс үөрэҕэр үөрэнэ баран, блокадаҕа түбэһэн, ыар дьылҕаланан, сэттэ уол сэриигэ, сорохтор аччыктаан, доруобуйалара айгыраан өлбүттэрин, алта эрэ кыыс тыыннаах төннөн кэлбиттэрин долгуйа иһиттибит.
Элбэх киһи тыынын быыһаабыт 125 грамм нуорма хара килиэп туһунан иһиттибит, оччо нуормалаах хара килиэби амсайдыбыт. Оччотооҕу блокада килиэбэ бүгүҥҥү килиэппитинээҕэр олох атын эбит.
Б у тэрээһинтэн Ленинград куорат олохтоохторо 1941 сыл балаҕан ыйын 8 күнүттэн 1944 сыл тохсунньу 27 күнүгэр диэри хайдахтаах эрэйи-муҥу көрбүттэрин, кытаанах үлэҕэ сылдьыбыттарын, аччыктааһын ыараханын тулуйбуттарын биллибит. Розалия Андреевна ис сүрэҕиттэн истиҥник кэпсээбитэ сүрэхпитигэр тиийдэ.
«Сэрии кэмин оҕолоро», «Блокада килиэбэ» диэн ааксыйалар тоҕо ыытыллалларын өйдөөтүбүт. Биһиги дойдубут историятын, сэбиэскэй норуот фашизмы утары хайдах сэриилэспитин хайаан да билиэхтээхпит. Биһиги билиҥҥи эйэлээх халлааммыт, барыта баар бэлэм олохпут туһугар охсуспут аҕа көлүөнэни өйдүөх, сыаналыах тустаахпыт.
Ааптар: Наташа СТЕПАНОВА, Боронук оскуолатын үөрэнээччитэ, Үөһээ Дьааҥы.