Ийэ — оҕоҕо күн сирин көрдөрбүт, кини үтүө киһи буола үүнэн-сайдан тахсарыгар бары кыһамньытын уурар, иитэр-үөрэтэр күндү киһибит, дьиэ кэргэн тирэҕэ. Ийэ баар буолан, дьиэ иһигэр сылаас сыһыан, ил-эйэ, харыстабыл олохсуйар.
Бүгүн, атырдьах ыйын 28 күнүгэр, Үөһээ Бүлүү улууһун Дүллүкү нэһилиэгэр күндү дьоммутугар аналлаах «Ийэ скверэ» үөрүүлээх быһыыга арылынна. Сквери Ариан Георгиевич Потапов салайааччылаах СК «Баланс» тэрилтэ тендергэ кыайан ылсан тутта. ООО » ЯрСтрой» тэрилтэ салайааччыта Юрий Васильевич Яроев Дүллүкү устуоруйатын олохтоохтортон ыйыталаһан, бырайыагын оҥордо. Биһиги нэһилиэкпитигэр бастакытын киһи мөссүөннээх өйдөбүнньүк тур «Дүллүкү нэһилиэгэ» ТсП баһылыга Н.А. Романов сквер тутуутугар көмөлөспүт олохтоох дьоҥҥо С.В. Титовка, Н.Н. Прокопьевка, И.Н. Ивановка, В.В. Васильевка уо.д.а. махтал суруктары туттартаата.
Мин сквер арыллыытыгар кэлбит дьонтон ыйытыыларбар эппиэттииллэригэр көрдөстүм. Ыйытыыларым манныктар:
1. Эһиги дьиэ кэргэҥҥитигэр көлүөнэттэн көлүөнэҕэ ханнык сүрүн үгэһи тутуһаҕытый?
2. Оҕо сааскыттан ийэҥ туһунан саамай чаҕылхай, сылаас ахтыы?
3. Ийэ скверин тутуута төһө табыллыбыт дии санаатыҥ?
4. Сквери 10 сылынан хайдах көрөҕүнүй? Манна туох уларыйыай?
Вера Даниловна Афанасьева маннык хоруйдаата:
— Ийэбит биһигини түмсүүлээх буоларга ииппитэ.
— Ийэбит 15 оҕону көрөн-истэн улаатыннарбыта. Ийэбэр өрүү махтанабын.
— Сквер тутуута олус табыллыбыт. Герой Ийэлэр хаартыскалара баара буоллар, өссө үчүгэй буолуо этэ дии санаатым.
— Сквер үчүгэй көрүүлээх-истиилээх, олордуллубут мастар үүнэн кэрэ көстүү буолуоҕа.
Акулина Петровна Максимова:
— Оҕолорбун кытта өрүү бииргэбит, түмсүүлээх буоларга дьулуһабыт.
— Мин дьоммор соҕотох оҕо буолабын, онон ийэбэр, аҕабар атаахтык иитиллибитим. Ийэм наар таптаан, имэрийэн, хаһан да мөхпөккө, бары үтүөҕэ ииппитэ.
— Олус астык. Оҕолор, ыччат үчүгэйдик көрөн-истэн сылдьаллара буоллар.
— Сквер өссө тупсуо дии саныыбын.
Наталья Григорьевна Семенова:
— Оҕолорбутугар, сиэннэрбитигэр төрүччүлэрин биллэрэ, үөрэтэ сатыыбыт.
— Ийэм барахсан 7 оҕону иитэн, үөрэттэрэн улаатыннарбыта, иллээх-эйэлээх буоларга уһуйбута.
— Сырдык, ыраас сквери харыстаан көрө-истэ сылдьалларыгар баҕарабын.
— Инникитин сибэкки олордон, өссө тупсаҕай көстүүлээх буоларыгар баҕарабын.
Николай Петрович Романов, «Дүллүкү нэһилиэгэ» ТсП баһылыга ыйытыыларбар маннык хоруйдаата:
Үлэ хаамыытыгар уонна технологиятыгар, сири-уоту былааннааһыҥҥа, тупсарыыга туох уустуктар баалларай?
— Сөптөөх сири булууга уонна өрүс уҥуор паромунан туорааһыннаах буолан, матырыйаалы тиэйэн аҕалыыга ыарахаттар бааллара.
Биһиги усулуобуйабытыгар сквер уһуннук бөҕө туруктаах турарыгар ханнык матырыйааллар туттуллубуттарай?
— Ирдэбилгэ эппиэттиир матырыйаалларынан тутулунна. Билиитэтэ, тимирдэрэ, памятник өр туруоҕа. Маһа лаахтанна, сквер кэмиттэн кэмигэр саҥардылла туруоҕа.
Ханнык скульптор өйдөбүнньүгү оҥордо?
— Владимир Степанович Левин өйдөбүнньүгү оҥордо.
Сквергэ саамай табыллыбыт, эн санааҕар, тугуй?
— Памятник олус табыллыбыт. Дүллүкү кэрэ көстүүлэрэ бырайыакка киирбитэ олус үчүгэй.
Манна сынньана, көрө кэлэр дьоҥҥо тугу баҕарыаххыный?
— Сквергэ кэлэр дьон ыраастык көрө-истэ сылдьалларыгар баҕарабын. Дьоруой Ийэлэргэ махтанан сибэкки дьөрбөтүн ууран ааһыахтарын сөп.Үөрүүлээх күҥҥэ кэлбит ыалдьыттары эҕэрдэлиир ырыа-тойук дьиэрэйдэ.
Ытык дьоммутугар аналлаах саҥа тутуу нэһилиэкпит биир кэрэ көстүүтэ, ийэҕэ үйэлээх махтал, сүгүрүйүү бэлиэтэ буолан, олохтоохтору үрдүккэ-кэрэҕэ угуйа, үөрдэ туруоҕа. Ыччат дьон көрө-истэ, харыстыы, тупсара сылдьыахпыт.
Ньургун Романов, 8 кылаас, Дүллүкү, Үөһээ Бүлүү, «Эрчим» медиакиин
Кэскил14.ру