«АгроМетео» эбии дьарыкка күнү-дьылы, үүнээйини, хамсыыр-харамай олохторун, дьыл кэмнэринэн, саха ыала үлэтин-хамнаһын кэтээн кѳрѳргѳ, болҕомтолоох буоларга үѳрэнэбит. Айылҕаны кэтээн кѳрүүгэ биһиги Маргарита Афанасьевна, Александр Августович Герасимовтар күнү-дьылы бэлиэтиир «Күннүк» дьылдьыттарын туһанабыт. «Күннүкпүтүн» иккис сылбытын толоро сылдьабыт. Айылҕаны күннэтэ кэтээн кѳрѳн былыттары, сѳӊүү түһэрин, салгын температуратын, тыал хайысхатын болдьох бэлиэлэринэн бэлиэтээн иһэбит.
Учууталбыт Дария Егоровна араас сорудахтары биэрэр. Холобур, эмблема оӊоруута, ыйынан ураты айылҕа кѳстүүтүн хаартыскаҕа түһэрии, эссе суруйуу уонна да атын сорудахтар.
2018 сылга ѳрѳспүүбүлүкэҕэ Герасимовтар дьиэ кэргэн кѳҕүлээһининэн «Айылҕаны кэтээн кѳрүү-2018» диэн куонкуруска биһиги оскуолаттан 23 оҕо «Күннүгү» толорон кыттыбыта. Бу куонкурус түмүгүнэн биһиги оскуолаттан мин, Стас Богдокумов уонна Айсулу Жараева «Сосновый бор» лааҕырга баран үѳрэнэн, сынньанан кэлбиппит. Үлэбитин кѳмүскээн дипломунан наҕараадаламмыппыт. Бу лааҕырга сылдьан, биһиги «Күннүк» ааптарын, айылҕаны кэтээн кѳрѳѳччү Александр Августович Герасимовы кытта билистибит, айылҕаҕа сыһыаннаах элбэх туһалааҕы биллибит.
«Күннүгү» мин балтыларым Лиза, Айаана эмиэ толороллор. Ийэбит Людмила Васильевна, аҕабыт Павел Николаевич эмиэ кѳмѳлѳһѳллѳр. Холорбур, былырыын Амма мууһа ыам ыйын 10 күнүгэр устубута уонна хочону барытын ылбыта, онтон быйыл муус Амма хаатыттан тахсыбакка, мууһа устубута уонна хочоҕо тахсыбата. Быйыл тураах уйатын эрдэттэн оӊосторун кѳрбүппүт уонна уу кэлбэт эбит диэн сабаҕалаабыппыт. Кэтээн кѳрѳрбүтүнэн, быйыл дьылбыт эрдэ сылыйда, үѳн-кѳйүүр эрдэ тилиннэ, үүнээйи эрдэ кѳҕѳрдѳ. Итинник, былырыыӊӊыны кытта быйылгыны тэӊнээн кѳрүѳххэ сѳп, кэлин сылыктыырга үѳрэнэн, үлэни аттарыахха сѳп буолар.
Түмүкпэр этиэм этэ, бу күннүгү кытта үлэлээн, биллиим-кѳрдүүм кэӊээтэ, элбэҕи ситистим. «Погода для всех» аан дойдутааҕы куонкуруска «Морозное дыхание» хаартыска күрэҕэр «За самую позитивную работу», эссе суруйуутугар «За ведение собственных наблюдений за погодой и описание отмеченных природных явлений» дипломнарынан бэлиэтэнним. Хаартыска аан дойдутааҕы «Север моей мечты» куонкуруһугар I степеннээх дипломунан наҕараадаламмытым.
Өбүгэлэрбит мындыр дьарыктарын, айылҕа туругун билгэлиир үтүѳ үгэстэрин умнумуоҕуҥ!
Мичийэ Канаева, VIII кылаас.
Чычымах, Таатта.
«Күннүк-2018» кыттыылаахтара.
Е.П.Иванов сиэнин Алинаны кытта.
«Күннүк-2019» кыттыылаахтара.
Дьулусхан Неустроев.
М.М.Богдокумова сиэнин Стаһы кытта.
Айсен Егоров.
З.А.Малышева.
Айсулу Жараева.