Бүгүн бэс ыйын 15 күнэ. Оскуоланы бүтэрэн олох киэҥ аартыгар үктэнээри турабын. Мин быйыл Чурапчы улууһун А.П. Илларионов аатынан Хайахсыт орто оскуолатын бүтэрэбин. Оскуолам олоҕо 2014 сыллаахха бу мантан, төрөөбүт нэһилиэкпиттэн, саҕаламмыта.
Билигин элбэҕи билэн-көрөн оскуолабын бүтэрэн, оҕолору кытта үлэлэһэр идэни баһылаары сылдьар киһи буоларбыттан бэйэм да соһуйабын. Үөрэммитим тухары, эппитим курдук, элбэҕи билбитим. Кыра сааспыттан олус актыыбынай, араас тэрээһиннэргэ көхтөөхтүк кыттар, саҥаны, сонуну сэргиир, сэҥээрэр оҕо этим. Ол иһин 8-с кылааска сылдьан оскуолабыт «Эрэл» оҕо хамсааһыныгар интэриэһиргээн туран киирбитим.
Сөбүлээн туран кыттар күрэҕим научнай-практическай кэмпириэнсийэ буолара. Онно алын кылааска учууталым Анна Петровна Федулова салайыытынан ахсаан чэрчитинэн саҕалаабытым, кэлин саха тылыгар учууталым Надежда Семеновна Борисова салайыытыгар култуура өттүнэн – Аал Луук Мас туһунан буолбута.
10-с кылааска, мин санаабар, оскуолам олоҕор саамай умнуллубат түгэннэрим дьэ саҕаламмыттара. 2024 сыллаахха олунньу 2 күнүгэр өрөспүүблүкэтээҕи «СААС» медиа форум иһинэн ыытыллыбыт «Муус устар»ыччат бэстибээлин сүүмэрдиир түһүмэҕэр бастакы миэстэ буолбуппут уонна Дьокуускай куоракка «Бэс Чагда» лааҕырга путевка сүүйбүппүт. Ис иһиттэн эттэххэ, олуһун соһуйбутум уонна сөхпүтүм. «Хайдах медиа өттүнэн үөрэҕэ суох уонна саҥа саҕалаабыт дьоннор бастыахтарын сөбүй» диэн санаа кэлбитэ миэхэ оччолорго. Лааҕырга сылдьан күн бүгүҥҥээҥҥэ диэри кэпсэтэр, билсэр чугас доҕотторбун булбутум. Онтон медиа хайысхата киһини бары өттүнэн сайыннарар, арыйар эбит.
Салгыы норуоттар икки ардыларынааҕы 8-с «Азия оҕолоро» оонньууларыгар оҕо пресс киинигэр бииргэ үөрэнэр кыыспын Света Заровняеваны кытта сүүмэрдэнэн үлэлээбиппит. Онтон ситиһиилээх үлэм иһин Москва куоракка баран үөрэнэн, сынньанан кэлбиппит.
«Муус устар» ыччат бэстибээлин иһинэн ыытыллар «Саас» медиа форум туһунан этиэхпин баҕарабын. Маннык курдук улахан таһымнаах, олус интэриэһинэй, киһи санаатын тутар тэрээһин баарын билбэт да этим. Маннык форум ыытыллара олус үчүгэй. Мин бу форумҥа кыттыбыт дьоллоох киһибин.
Бу сылы олуһун өйдөөн, таптаан, өйбөр умнуллубаттык хатаан хааллым. Кыра сылдьан маннык курдук улахан дьаһалларга сылдьыам диэн санаан да көрбөтөҕүм. Билигин кэлэн чопчу бу күннэри умнуом суоҕа диэн эрэллээхпин.
Түмүкпэр барҕа махталбын тиэрдиэм этэ – дириэктэр иитэр үлэҕэ сүбэһит Саргылана Прокопьевна Леонтьеваҕа, саха тылын учууталыгар Надежда Семеновна Борисоваҕа, «Кэскил» оҕо бэчээтин кыһатын дириэктэригэр Ольга Ивановна Семеноваҕа, оскуолабыт медиа киинин кураторыгар Сардаана Анатольевна Матвееваҕа.
Эһиги көмөҕүт, сүбэҕит инники баһылыахтаах идэбин таларбар көмөлөстө, дьону кытта сөптөөхтүк алтыһарга, хамаандаҕа үлэлииргэ, дьону сатаан истэргэ, информацияны сөптөөхтүк тиэрдэргэ үөрэттэ.
Вадим КОЛЕСОВ, А.П. Илларионов аатынан
Хайахсыт орто оскуолатын 2025 с. выпускнига, Чурапчы