Алтынньы 5 күнүгэр Бүлүү улууһун үөрэҕириитин эйгэтигэр ураты суолталаах күн буолла. Учуутал күнүн таһынан, Нина Иннокентьевна Протопопова аатынан «Кэскил» оҕо айар-тобулар дьоҕурун сайыннарар киинэ олохтоммута 75 сыллаах юбилейын бэлиэтиир нэдиэлэтэ үөрүүлээхтик саҕаланна! Саҥа үөрэх дьылыгар үөрэҕирии ситимигэр киирбит эдэр педагогтарбыт биир идэлээхтэр дьиэ кэргэттэригэр өрөгөйдөөхтүк кыттыстылар.
Тэрээһини «Кэскил» оҕо киинин салайааччыта, СӨ үөрэҕириитин туйгуна С.А. Васильева үөрүүлээхтик арыйда уонна эдэр педагогтарга өйдөбүнньүк сэмэй бэлэхтэри туттарда. Саҥа күүс буолан киирбит эдэр коллегаларга үрдүк категориялаах эбии үөрэхтээһин педагога, РФ үөрэҕириитин эйгэтин бочуоттаах үлэһитэ Т.С. Богарытова бэйэтин дириҥ ис хоһоонноох алгыс тылларын тиэрдэн, үлэҕэ-үөрэххэ кынат уурда. Киирбит эдэр кэскиллээх үлэһиттэр оҕо кутун тутарга, педагог үрдүк аатын үйэ тухары ыраастык илдьэ сылдьарга дохсуннук уонна биир киһи курдук андаҕар тылларынан биэрдилэр.
Тэрээһин түмүгэр, Саха сиригэр оҕо бэчээтин үйэ тухары салайбыт, улууспут киэн туттуута Нина Иннокентьевна Протопопова аатын үйэтитэр ытык пааматынньыгар сибэкки дьөрбөтүн ууран, сырдык кэриэһигэр дириҥ ытыктабылы биллэрдилэр.
Күндү учууталларбытын, үөрэҕирии эйгэтин бэтэрээннэрин уонна «Кэскил» киинин кэлэктиибин үбүлүөйүнэн итиитик-истиҥник эҕэрдэлиибит! Саҥа үлэ-үөрэх дьылыгар ситиһиилэри уонна сырдык суолу баҕарабыт!
Н.И. Протопопова аатынан «Кэскил» ИТЦ