Новосибирскай куоракка Бүтүн Россиятааҕы «АгроНТИ-2021» диэн тыа хаһаайыстыбатынан дьарыктанар кыра куораттар, нэһилиэктэр оскуолаларын үөрэнээччилэригэр туһуламмыт күрэх буолан ааста. Манна Саха сириттэн 29 оҕо кыттыыны ылла. Олор истэригэр Сунтаар улууһун Бүлүүчээннээҕи лицей 8 кылааһын үөрэнээччитэ Миранда Морозова «АгроБио» хайысхаҕа хамаанданан бастакы миэстэни ыллылар!
Ол туһунан эдэр агроном биһиги саайпытыгар бэйэтин санаатын үллэстэр:
— Бастаан «АгроНТИ-2021» күрэх туһунан мин 2020 с. билбитим, ол сыл биһиги скуолабытыттан икки оҕо финалга Москваҕа баран миэстэлэһэн кэлбиттэр этэ. Мин ону истэн баран, эмиэ оннук күрэхтэһэ барыахпын баҕарбытым.
Онтон сыыйа-баайа агротехнология салаатыгар бэйэбин холонорго санаммытым. «АгроБио» диэн хайысханы биологияҕа учууталым сүбэтинэн талбытым. Республикаҕа сүүмэрдээһини ааһан, финалга кыттар чиэскэ тиксибитим.
«АгроНТИ-2021» күрэхтэһии олус таһымнаахтык Новосибирскай куоракка буолан ааста. Тэрийээччилэр олус интэриэһинэй гына тэрийбиттэр.
«АгроБио» диэн хайысхаҕа Саха сирин араас улуустарыттан 6 саамай өйдөөх, бастыҥ оҕолор талыллан кэлбиппит.
Урут хаьан да көрсүбэтэх, билсибэтэх оҕолор 5 күн иһигэр Дьокуускайдааҕы Арктический ГАТУ-га эйэ дэмнээхтик көрсөн-билсэн, олус учугэйдик үөрэннибит, эбии эрчилиннибит. Онно биһигини 2 куратор үөрэппитэ. Тоҕо биир куратор оннугар икки диир буоллаххытына, биһиги «АгроБио» диэн хайысхабыт өссө икки араас түһүмэхтээх: «Үүнээйини харыстааһын» уонна «Сити фермер» диэн. Бастакы түһүмэҕи Наталья Ильинична Петрова олус учугэйдик быһааран , көрдөрөн үөрэппитэ, оттон иккис «Сити фермер» диэн түһүмэҕи Александр Семёнович Филатов эмиэ олус үчүгэйдик ыйан-кэрдэн, билиибитин хаҥаппыта.
Хамаандабытыгар 6 кыыс баар этэ, сааспытынан олус тэҥэ суохпут эрээри, бастакы күнтэн ыла олус үчүгэйдик тапсан, биир санаанан салайтаран үлэлээн саҕалаабыппыт.
Бу кыайыыбытыгар биһиги муҥура суох үөрэбит. Учууталларбытыгар, тэрийээччилэргэ олуһун диэн махтанабыт.
Оҕолорго этиэм этэ, баҕалаах буоллаххына, тугу барытын ситиһиэххэ сөп. Сүрүнэ — баҕа эрэ наада. Мин биир сыл иһигэр сөбүлүүр дьарыкпын сайыннаран бу ситиһии үктэллэнним. Онон барыгытыгар баҕа санааҕытын — сыалгытын ситиһэргитигэр баҕарабын!
Оҕолоор, Миранда этиитигэр кытыһан туран, баҕа санааҕытын ситиһэргэ дьулуһаргытыгар ыҥырабыт! Ким ыра санаалаах — ол олоххо сыаллаах.
Суруйда Анна СЛЕПЦОВА.