Эрчимэн Петров диэн Василий Филиппов аатынан Бэрдьигэстээх улуустааҕы гимназиятын 10 кылааһын үөрэнээччитин кытта бүгүн кэпсэттим. Чинчийэр үлэнэн кыра кылаастан дьарыктанар эбит. Чинчийиилэрэ үксүн тулалыыр эйгэни, экологияны, кыылы-көтөрү кэтээн көрүүтүн кытта сибээстээх. Бастакы үлэтин үһүс кылааска үөрэнэ сылдьан саҕалаабыт эбит. Бэрдьигэстээҕэр баар Маатта үрэх киртийиитин үөрэтэн, 5 кылааска Обнинск куоракка баран, бүтүн Арассыыйа кэмпириэнсийэтигэр кыттан дипломант буолбут! Онтон кэнники экологияттан аны зоологияҕа көспүт. Гимназия Саха сирин наукаларын академиятын кытта тэрийбит экспедициятигэр хас да сыл сылдьан (Тетеревиные) куртуйах бииһин ууһун үөрэппит. Бу көтөрдөр тугу сииллэрин, аһыылларын кичэйэн үөрэппит. Ону таһынан 2021 сылтан Өлүөхүмэ улууһун «Оскуола үөрэнээччилэрин айар дьоҕурдарын сайыннарыы уонна гуманитарнай үөрэхтээһин киинэ» тэрийбит «Научное лето» бырайыагар таһаарыылаахтык дьарыктанарын киһи үөрэ истэр. Элбэх кэмпириэнсийэҕэ ситиһиилээхтик кыттыбыт. Ити үлэтинэн «Шаги в науку» аан дойду таһымнаах кэмпириэнсийэҕэ «Лучшая исследовательская работа» анал уонна лауреат үрдүк аатын ылбыт.
2023 сайын бииргэ дьарыктанар оҕолорун кытта Санкт Петербург куоракка баран биир ыйдаах эдэр чинчийээччилэр үөрэхтэрин ааспыта бэрт үгүһу биэрдэҕэ. Былырыыҥҥаттан, оҕо эрдэҕиттэн дьиктиргии көрөр кыылын-көтөр кутуйахтары үөрэтиитин саҕалаабыт. Саха сиригэр көтөр кутуйах 7 көрүҥэ баарыттан биир көрүҥ, «Северный кожанок» диэн, Горнайга баарын үөрэппит. Ол курдук экологиятын: олорор сирин, хаһан ордук сөбүлээн бултаһа тахсарыгар тиийэ үөрэппит.
Бу маннык элбэх ситиһиилээх, кэпсээннээх, ааттыын Эрчимэн диэн уолга билим суолугар киэҥ далааһыннаах ситиһиини баҕарыаҕыҥ.
Дая Неустроева, «Кэскил» эдэр кэрэспэндьиэнэ, Томпо, Кириэс-Халдьаайы, 11 кылаас үөрэнээччитэ