Учуутал диэн кимий? Кини ханнык предмети үөрэтэриттэн тутулуга суох, сатабыллаах иитээччи, бэйэтин үлэтин туйгуннук билэр киһи. Мин киэн туттар учууталым, тренерим туһунан кэпсиэхпин баҕарабын. Кыра эрдэхпиттэн мас тардыһыы секциятыгар сөбүлээн дьарыктанабын. Бу секцияны өр кэм ситиһиилээхтик Семен Семенович Попов салайан үлэлэтэр.
Семен Семенович 1977 с. Мэҥэ Хаҥалас оройуонун Наахара нэһилиэгэр төрөөбүтэ. Кини оҕо сааһа Тарат нэһилиэгэр ааспыта. Үөрэҕин бүтэрээт, 2002 сыллаахха Амма улууһун Мээндиги орто оскуолатыгар биология учууталынан ананан үлэтин саҕалаабыта. Кини кыра оҕо эрдэҕиттэн спорт араас көрүҥнэригэр дьарыктаммыта. Ол курдук, тустуунан, туризмынан, мас тардыһыытынан үлүһүйэн, араас күрэхтэһиилэргэ улуус, өрөспүүбүлүкэ таһымыгар күрэхтэспитэ.
Мээндигигэ кэлбит сылыгар тута «Туризм» секциятын үлэлэтэн, эбии үөрэхтээһиҥҥэ үөрэнээччилэри эт-хаан өттүнэн иитиигэ дьарыктаан барбыта. Бастакы иитиллээччилэрэ: Владик Софронов, Ира Филиппова, Ганя Филиппов, Егор Петров, Андрей Удин, Тит Аммосов, Ариян Данилов, Петя Софронов, Айаал Попов өрөспүүбүлүкэ, Арассыыйа араас күрэхтэригэр кыттыбыттара.
Бу ситиһиилэриттэн кынаттанан 2015 сылтан хайысхатын уларытан Аммаҕа спортивнай оскуолаҕа мас тардыһыытын тренерэ буолбута. Мас тардыһыытынан утумнаахтык, ситиһиилээхтик дьарыктанан тахсыбыт иитиллээччилэрэ: Максим Удин, Айаал Попов, Айсен Тарабукин, Денис Солдатов, Юля Мигалкина, Оксана Жиркова, Айуран Степанов, Игорь Борисов, Эрчим Солдатов, Алена Деляева, Семен Попов, Ангелина Борисова, Кирилл Иванов, Оля Неустроева, Кристина Охлопкова, Борис Иванов, Алина Старостина, Аман Павлов, Ньургун Старостин, Айаал Деляев улуус, өрөспүүбүлүкэ, Арассыыйа таһымыгар тиийэ үүнэн-сайдан таҕыстылар.
Күүстээх дьарык, сыра-сылба сыыйа үрдүк ситиһиилэргэ кынаттаабыттара. 2012 сыллаахха Тит Аммосов Владивосток куоракка бүтүн Арассыыйатааҕы «Кубок Тихого океана» диэн туризм күрэҕэр 3-с миэстэни ылбыта. 2021 сыллаахха Кристина Охлопкова уонна мин Екатеринбург куоракка мас тардыһыыга «Первенство России» кыттан кыһыл көмүс уонна үрүҥ көмүс мэтээллээх дойдубутугар үөрүү-көтүү көтөллөөх кэлбиппит. Манна барытыгар биһиги киэн туттар тренербит Семен Семенович элбэх сыл үлэлээбит үлэтэ, кылаата көстөр. 2017 сылтан Мээндигигэ Семен Семенович көҕүлээһининэн спорт бэтэрээнэ, полиция майора Владимир Александрович Никитин бирииһигэр аһаҕас өрөспүүбүлүкэтээҕи биирдиилээн уонна хамаанданан мас тардыһыытын күрэҕэ ыытыллар.
Ханнык баҕарар учуутал, иитээччи саҥаттан саҥаны баһылааһына уонна ол билиитин үөрэнээччилэригэр утумнаахтык, дириҥник тиэрдиитэ учуутал киэҥ билиитин, маастарыстыбатын туоһулуур. Билигин мас тардыһыыта өрөспүүбүлүкэҕэ эрэ буолбакка, Арассыыйаҕа, аан дойдуга тиийэ аатырда. Саха тɵрүт оонньуулара дьиҥ эр киһи буолан, буутуҥ этэ буспутун, сиһиҥ этэ сиппитин туоһулуур дии саныыбын. Тренербэр Семен Семеновичка өссө да элбэх иитиллээччилэри үүннэрэн-сайыннаран таһаарарыгар баҕарабын.
Аман Павлов, IX кылаас,
«Тыл баайа» медиа-киин
П.И. Караканов аатынан Мээндиги орто оскуолата
Амма