Сэтинньи 2 күнүгэр П.И. Кочнев аатынан Тулагы орто оскуолатыгар Бүтүн Арассыыйатааҕы «АгроНТРИ-2024» күрэххэ бэлэмнэнэр түһүмэх үөрүүлээх арыллыыта буолла.
П.Н. уонна Н.Е. Самсоновтар ааттарынан Хатас, Айыы Кыһатын уонна Тулагы орто оскуолаларын оҕолоро кыттыыны ыллылар. Ону таһынан, Арктикатааҕы Судаарыстыбаннай агро-технологическай университет устудьуоннара уонна преподавателлэрэ бэйэлэрин уопуттарын үөрэнээччилэргэ билиһиннэрдилэр. Бэлиэтээн эттэххэ, университет бу күрэх регионнааҕы площадката буолар.
Оскуола дириэктэрэ Дмитрий Васильевич Андросов эҕэрдэ тылыгар билим, инновация, технология эйгэтэ оскуолалары уонна үрдүк үөрэх кыһаларын түмэн тыа хаһаайыстыбата сайдарыгар күүстээх олук уурарын чопчулаан эттэ.
АГАТУ билимҥэ уонна инновацияҕа проректора, ветеринарнай билим кандидата Константин Револьевич Нифонтов бу күрэх 2018 сыллаахха аан маҥнай ыытылларыгар тыа сирин уонна алын куораттар оскуолаларын 5-11 үөрэнээччилэриттэн 583 сайаапка киирбит буоллаҕына, быйылгы дьылга икки мөлүйүөнтэн ордук сайаапка киирэн турарын бэлиэтээн эттэ.
Бэлэмниир түһүмэх бары кыттыылаахтара «ДоброПчёл: цифровой технологияны тигээйини иитиигэ туһаныы»; «АгроКосмос: космостан түһэриллибит хаартыскалары үлэҕэ туһаныы»; «АгроМетео:халлаан туругун кэтээн көрүү, архив оҥоруу, анаалыстааһын»; «АгроКоптеры: агропромышленнай комплекса беспилотнигы туһаныы»; «АгроРоботы:техниканы салайарга автоматизированнай системаны туһаныы; «АгроБио: тыа хаһаайыстыбатыгар үөнү-көйүүрү утарыбиологическай көмүскэли туһаныы»; «АгроВет: дьиэ сүөһүтүн көрүүгэ саҥа технологияны туһаныы»; «АгроРоверы:роботизированнай системалары дьиҥнээх олоххо туһаныы» хайысхаларынан арахсан кыттыыны ыллылар.
Гаврил Николаевич Гаврильев устудьуоннар первичнай провсоюзнай тэрилтэлэрин бэрэссэдээтэлэ оҕолор бу күрэххэ кыттаннар партнер үрдүк үөрэх кыһаларыгар киирэргэ эбии баал, ону таһынан, кыайыылаах оҕолор МДЦ «Артекка» путевка ылыахтарын сөбүн туһунан эттэ.
Кыттааччыларга билим уонна технология эйгэлэригэр ситиһиилэри баҕарыаҕыҥ.
Полина ЕФИМОВА, IX «А» кылаас, Тулагы.
Салайааччы Лидия Сатырова