Биһиги алтынньы 9 күнүгэр Тиит-Арыы нэһилиэгэр бара сылдьыбыппыт. Онно М.Е. Васильева аатынан 2 Малдьаҕар орто оскуолатын оҕолоро Тиит-Арыы орто оскуолатын үөрэнээччилэригэр маастар-кылаас көрдөрбүппүт. Кириэс тэбии, тутум эргиир, көтөх ынаҕы туруоруу, ойбонтон уулааһын, хабылык, хаамыска курдук сахалыы спорт көрүҥнэригэр үөрэппиппит. Оскуола оҕолоро саха төрүт оонньууларын интэриэһиргээтиннэр уонна элбэхтик дьарыктанныннар диэн, тутум эргийэр снаряд бэлэхтээбиппит.
Быйыл оскуолабытыгар «Бөртө» диэн ааттаах спортивнай кулууп арыллыбыта. Ол туһунан оҕолорго эмиэ кэпсээбиппит. Биһиги оскуолабыт үөрэнээччилэрэ сыл устата араас спорт көрүҥнэринэн спартакиадаҕа кыттабыт. Бастакы күрэхпит ыстаҥа буолар. Сыл аайы «Дьулурҕан» диэн саха төрүт оонньууларыгар улахан күрэхтэһии ыытабыт, «Игры предков» диэн агрооскуолалар республикатааҕы күрэхтэһиилэрэ иккитэ биһиги оскуолабытыгар ыытылынна. Мин эдьиийбин Лизаны кытта сахалыы төрүт көрүҥнэринэн дьарыктанабыт. Лиза республикаҕа муҥутуур кыайыылаах буолбута
Ильяна Осипова,
М.Е. Васильева аатынан 2 Малдьаҕар орто оскуолатын
7 кылааһын үөрэнээччитэ