Идэҕэ туһаайыы үлэтэ сөптөөхтүк уонна түмүктээхтик ыытылларын туһуттан, «Роль профессионалов Якутии в развитии геостратегических территорий» өрөспүүбүлүкэтээҕи форум чэрчитинэн Ньурба оройуонугар алтынньы ый 11 күнүгэр нэһилиэнньэ дьарыктаах буолуутун киинин салалтата үөрэх салалтатын кытары Ньурба оройуонун үрдүкү кылааһын үөрэнээччилэригэр аналлаах Профориентация күнүн тэрийэн ыыттылар. Бу күн оҕолор хас да тэрилтэлэринэн арахсан экскурсияларга сырыттылар. Ол курдук, аэропорт, профтехникум, театр, аэронавигация уонна да атын тэрилтэлэр ааннарын аһан үөрэнээччилэри көрүстүлэр.
Биһиги Хаҥалас оҕолоро Акана, Марха, Сүлэ, Ньурба техничэскэй лицейын үөрэнээччилэрин кытары Маар нэһилиэгэр баар Ньурба профессиональнай техникумугар сырыттыбыт. Манна училище үлэһиттэрэ ханнык идэлэр баалларын, туох уратылардаахтарын сырдаттылар, ханнык идэлэр кэнники кэмҥэ ордук наадалаахтарын туһунан кэпсээтилэр.
Техникум устудьуоннара үөрэнэр-олорор сирдэрин көрдөрдүлэр, манна баар музейга сырытыннардылар. Ньурбатааҕы техникумҥа сварщик, слесарь, автомеханик, булдьозерист, машинист уонна да атын идэлэри баһылыахха сөп. Ону таһынан психолог И.И. Васильева оҕолорго инники идэлэрин хайдах сөпкө талыахтаахтарын сүбэлээтэ. Үөрэнээччилэр хас да сиринэн сылдьан устудьуоннар бу техникумҥа идэ ылаары туохха үөрэнэллэрин, анал тэриллэринэн үлэлиир, туттар маастар-кылаастары көрдүлэр. Манна баҕалаах оҕолор бэйэлэрин араас идэҕэ холоннулар. Күн бүтүүтэ профориентационнай үөрэҕи ааспыттарын туоһулуур сертификаттары директор Андрей Егорович Федоров туттартаата.
Бу маннык олус туһалаах тэрээһин буолан ааспыта оҕолорго инникитин идэ таларга көмө буолара саарбаҕа суох.
Анжелина ЖДАНОВА,11 кылаас. Хаҥалас, Ньурба, «Ыллык» эдкорпост.