Төрүт олохтоох норуоттар Аан дойдутааҕы күннэрин көрсө хайаан даҕаны Муома улууһун Улахан-Чыыстай нэһилиэгин «Магир» көһө сылдьар ыстаада олохтоохторун, удьуор табаһыттары Дьячковтар дьиэ кэргэттэрин эҕэрдэлээн ааһар үгэстээхпит.
«Магир» тыа хаһаайыстыбатын приозводственнай дьиэ кэргэнинэн көһө сылдьар община бэрэссэдээтэлэ Екатерина Дьячкова бу сайын лааҕырга 13 оҕо сайылаата диэн иһитиннэрдэ.
«Оралчимна» лааҕыр оҕону таба иитиитигэр сыһыарар сыаллаах 21-с сылын ситиһиилээхтик үлэлиир. Лааҕырга сылдьыбыт оҕолортон таба ыстаадатыгар хаалан үлэлии хаалбыттар да элбэхтэр.
— Ыстаадабыт иһинэн «Оралчимна» диэн лааҕырбыт үлэлээбитэ 21 сыла буолар. Бэйэбит сиэннэрбитин, атын да оҕолору таба үлэтигэр иитэбит. Ол оҕолорбутуттан табаһыттар да бааллар, үөрэхтэрин быыһыгар, армия кэнниттэн кэлэн, ыстаадаларыгар көмөлөһөн бараллар.
— Быйыл сайыммыт этэҥҥэ ааста. Табаларбыт да доҕолоҥнооботулар уонна ыалдьыбатылар. Ол табаһыкка үөрүүлээх. Сайын аҥара наһаа куйаас күннэр турбуттара. Онтон аҥара төттөрүтүн сөрүүн, тымныы буолан, табаларга үчүгэй дьыл буолан биэрдэ. Биһиэхэ күн-дьыл туруга саамай табаҕа табыгастааҕа үчүгэй. Сөрүүҥҥэ табалар үчүгэйдик аһыыллар. Үөн-көйүүр эрэйдээбэт.
— Сайын ыстаадабытыгар 25 буолан сайылаатыбыт, 13 оҕо «Оралчимна» лааҕырбытыгар сырытта. Маны таһынан ыстаадаҕа улааппыт уолаттарбыт, билигин устудьуоннар, сынньалаҥнарыгар кэлэн көмөлөстүлэр. Манна эттэххэ, устудьуоннарбыт ыстаадаларын олус ахталлар, — диэн туран Екатерина Егоровна бүгүҥҥү Төрүт олохтоох норуоттар аан дойдутааҕы күннэринэн биир үөлээннэхтэригэр, Хоту дойду хоһууннарыгар сылаас эҕэрдэтин тиэрдэр.
Ити курдук, хоту сир оҕолоро сайыҥҥы сынньалаҥнарын үлэҕэ такайыллан атаараллар. Бу олох үөрүйэҕэ кэлин бэйэлэригэр олус туһалаах буолуо диэн бигэ эрэллээхпит.
keskil14.ru