Саха Өрөспүүбүлүкэтин «Спортивные якутяне» үөрэнээччилэр Спартакиадаларын көрсө Ньурба оройуонун эдэр спортсменнарын күрэхтэһиигэ алҕаан, үтүө тыллары этэн, ситиһиилэри баҕаран атаардылар.
Бу сэмэй эрээри суолталаах тэрээһин бүгүн, бэс ыйын 2 күнүгэр, ыытылынна. Манна оҕолорго эрэл санааларын, үтүө тылларын оройуон баһылыгын солбуйааччы Василий Николаевич Семенов, үөрэх салалтатын салайааччыта Фёдор Фёдорович Ушканов уонна спорт салалтатын салайааччыта Роберт Александрович Алексеев эттилэр. Кинилэр бу бэс ыйын 5-10 күннэригэр Дьокуускай куоракка ыытыллаары турар улахан суолталаах спортивнай күрэхтэһиигэ эдэр спортсменнарбыт оройуоннарын чиэһин көмүскээн, кыайыылары-хотуулары аҕаллыннар, бэйэлэрин кыахтарын көрдөрдүннэр диэн баҕа санааларын тиэртилэр.
Алгысчыт, норуот эмчитэ Алиса Михайловна Иннокентьева аал уоту аһатта, айах тутта уонна оҕолорбут этэҥҥэ сылдьалларын, ситиһии көтөллөөх эргиллэн кэлэллэрин туһунан көрдөстө.
Алгыс тыллар тиийэннэр, төрөөбүт дойдулара араҥаччылаан, күрэхтэһии кыттыылаахтара – Ньурбабыт эдэр спортсменнара кыайыы көтөллөөх төннүөхтэрэ диэн баҕа санаабат уҕараабат.
Алгыс баһа сыаланнын!
Анжелина ЖДАНОВА, «Ыллык» эдкорпост,
Ньурба Хаҥалаһа.