Үөһээ Бүлүүтээҕи М.Т. Егоров аатынан 2-ис оскуола оранжереятыгар сибэкки эгэлгэтэ, оҕуруот арааһа үүнэ турарыттан кини санаата көтөҕүллэр.
Оранжерея иһигэр оҥоһуу полкаларга, стеллажтарга, анал сибэкки иһиттэригэр дьэрэкээн сибэккилэр кэчигирэспиттэр, сорохторо кашполарга тураллар. Оҕурсуу дыргыл сыта киһини манньытар. Дьэдьэни тохсунньуттан саҕалаан олордон, сайыҥҥы өттүгэр парникка, онтон оранжеряҕа киллэрэн салгыы көрөллөр-харайаллар.
Оҕолор уонна салайааччы сылаас илиитинэн бүөбэйдэнэн үүнэ тураллара өтө көстөр. Сылы быһа төгүччү араас үүнээйини олордон, оҕолор элбэх албастарга үөрэнэллэр. Онон оскуола остолобуойун битэмииннээх аһынан хааччыйаллар.
“Быйыл оҕурсуу, помидор, салаат, укуруоп сэтинньи ыйтан олордон саҕалаатыбыт. Укуруобу, салааты түөртэ ыстыбыт. Оҕурсууну, помидору үстүү суорду олортубут. Манна ВУДка үөрэнэр оҕолор үлэлииллэр. Кыһыҥҥы өттүгэр сиигэ суох буолан оҕуруоту олордорго оччото суох эбит. Күҥҥэ иккитэ уунан ыһабыт, кэлин “увлажнитель воздуха” ылан туһана сылдьабыт. Салааты, укуруобу, оҕурсууну быһан остолобуойбутугар туттарабыт.
Билигин оҕолор 15 араас бегония араас суордун череноктаан олордон саҕалаатылар. 150 устуука тюльпан олортубут. Онтубутун сааскы бырааһынньыктарга атыылаабыппыт. Ону таһынан клубника уонна эустома олордон саҕалаатыбыт. Инники былааммыт диэн эһиил кыһыҥҥы оранжереяҕа оҕурсуубутун, помидорбутун ситэри үөрэтэн, чинчийэн баран олордуохпут”, — диэн оскуола агронома Елизавета Дмитриевна түмүктээтэ.
Оҕолор бу көрөн-харайан кэлбит үүнээйилэрин туһунан дакылаат суруйан, чинчийбит үлэлэринэн араас таһымнаах конференцияларга, ааҕыыларга ситиһиилээхтик кытталлар. Холобур, бу соторутааҕыта ыытыллыбыт Чугуновтуу ааҕыыларга 11 кылаас үөрэнээччитэ Каролина Тарасова “Будущее сельское хозяйство — это УПБ АгРосток” тиэмэнэн кыттан 1 ст. дипломант буолла. Онтон салайааччы Дмитриева Елизавета Дмитриевна республикатааҕы Алексеевтыы ааҕыыларга үлэтин уопутун кэпсээн 3 ст.дипломунан наҕараадаламмыта.
Эбии дьарыкка үөрэнэллэр оҕолор оҕуруоту үүннэриигэ, көрүүгэ-харайыыга үөрэнэн кэлин олохторугар тутталларыгар олук буолуо. Онон агрооскуола оҕону олоххо бэлэмниир биир ураты ньымата буолар.
М.Т. Егоров аатынан 2№-дээх орто оскуолатын “Сыккыс” пресс-киинэ.