Хаптаҕай орто оскуолатын 11 кылааһын үөрэнээччитэ Валя Спиридонова оскуола «Кустук» телестудиятыгар алын кылааска үөрэнэ сылдьан кэлбитэ. Бастаан «Минньигэстик утуйуҥ кырачааннар» биэриини ыытара. Бу биэриини ыытарга сюжетын толкуйдаан, ким «Жучка», ким «Бөрөчөөн» буоларын быһаарсан, тугу саҥарарын сурунан, үөрэтэн, кыылларбыт остуол анныгар киирэн, ведущай остуолга хаалан дьэ биэриибитин устар этибит. Салгыы кылаастан кылааска тахсарыгар сайдан, сонуннары кэпсиир, интервью ылар, биэриини ыытар буолан испитэ. Билигин Валя 11 кылааска ситиһиилээхтик наар 4 -5 сыаналарга үөрэнэр. «Кустук» медиастудия тутаах корреспондена.
Валя оскуола сонуннарын «Кэскилгэ» сырдатар, пилотнай проекпыт — медиоскуола тутаах ыытааччыта, толоругас, тургэн, этиллибити тута оҥоро охсор. Билигин улахан студиецтарбыт бүтэрэн бараннар, саҥа киирбит оҕолор кыралар онон сүрүн үлэһиппит Валя буолар. Кини эппиэтинэстээх буолан сонуммутун ыыта олоробут.
Мин студия салайааччыта Валябар улаханнык махтанабын, эппиэтинэстээхтик сыһыаннаһарыгар, бэриниилээхтик «Кустугар» 10-с сылын сылдьарыгар. Валя кырата суох ситиһиилэрдээх, ол курдук –бүтүн аан дойдутааҕы «Петербургский экран» видео күрэҕин 2 төгүллээх кыайыылааҕа, дипломана, аан дойдутааҕы «Мои дети большой войны» Оксана Федорова фонун күрэҕин 2 төгүллээх кыайыылааҕа, «Кэскил» хаһыат улууска ыыппыт слетугар визиткаҕа — 3 миэстэ, видеоҕа — 1 миэстэ, республиканскай «Бастыҥ радиопередачата» күрэх кыайыылааҕа, республиканскай НКИК «Хотугу сулус» күрэҕин лауреата, сылын аайы ыытыллар «Үрдэл»бириэмийэ «Лучший медиажурналист» премия номинана. «Кустукка» оҕолор кэлэллэр, тахсаллар, ким эрэ сөбүлээн уһуннук хаалар. 10 сылы быһа бастыҥ выпускнигым Констанция Никифорова, 13 сыл бастыҥ корреспондена Диана Терентьева, 10 сыл дэгиттэр кыыһым Сайаана сылдьыбыттара. Оҕо ханнык баҕарар куруһуокка, студияҕа уһуннук дьарыктаннаҕына ситиһии кэлэр.
Ол курдук, Валя саамай көмөлөһөөччүм, эрэллээх иитиллээччим. Кини, журналист да буолбатар, студияҕа ылбыт билиитэ, үлэлии, эппиэтинэстээх буоларга үөрэммитэ олоҕор туһалыыра саарбаҕа суох. Валябар экзаменнарын ситиһиилээхтик туттаран баҕарар үөрэҕэр киирэн үтүө-мааны үлэһит буоларыгар баҕарабын уонна эрэнэбин.
Н.Н. Яковлева, «Кустук» медиастудия салайааччыта, РФ уопсай үөрэхтээһинин бочуоттаах үлэһитэ, СР үөрэҕириитин туйгуна, «Учитель ученических признаний», «Улууска үөрэҕирии сайдыытын иһин» знактар хаһаайына, нэһилиэк бочуоттаах олохтооҕо.