Сунтаар улууһун Сунтаар бастакы нүөмэрдээх орто оскуолатын 11 кылааһын туйгун үөрэнээччитэ Вова Семенов Ил Дархан Харыйатыгар барар чиэскэ тигистэ.
Вова кыра кылаастан туйгуннук үөрэнэр. Сылын аайы араас олимпиадаларга, научнай конференцияларга, куонкурустарга ситиһиилээхтик кыттар. Кини кыра эрдэҕиттэн дуобатынан утумнаахтык дьарыктанар. Бу көрүҥҥэ улуус, өрөспүүбүлүкэ чемпиона, спорт маастарыгар кандидат. Өрөспүүбүлүкэ хамаандатын састаабыгар киирэн, Арассыыйаҕа хамаанданан иккис миэстэ ылтара.
Өрөспүүбүлүкэтээҕи Л.В. Андреева кэриэһигэр бокс күрэҕэр 3 миэстэлээх. «Инникигэ хардыы» НПК эрэгийиэннээҕи түһүмэҕин призера.
Вова аҥардас дуобатынан эрэ буолбакка, атын спортивнай күрэхтэргэ эмиэ ситиһиилээхтик кыттар. Баскетболга, волейболга үрдүк көрдөрүүлээх.
Эһиил оскуолатын бүтэрдэҕинэ, Вова М.К. Аммосов аатынан ХИФУ техническэй хайысхалаах үөрэҕэр туттарсаары бэлэмнэнэр.
Оскуолабыт киэн туттар үөрэнээччитэ Вова Семенов өссө да оскуолатын, төрөөбүт дойдутун аатын ааттата туруо диэн эрэнэбит. Эргиччи ситиһиилээх уолбутугар инникитин дьулууру, үрдүк чыпчааллары баҕарабыт!
Анисия Семенова, Сунтаар 1-кы нүөмэрдээх орто оскуолатын медиакиинэ.