Н.А. Брызгалов аатынан Индигир орто агрооскуолатыгар олохтоох спорт бэтэрээнэ Пётр Иванович Атласов сырдык кэриэһигэр нуучча дуобатыгар оройуоннааҕы күрэх ыытылынна. Пётр Иванович дуобат оонньуутун пропагандиһа, элбэх күрэх кыайыылааҕа, ону таһынан талааннаах мелодист, баянист. Кини тапталлаах түөлбэтин туһунан айбыт «Буор-Сыһыыга, биһиэхэ» диэн ырыата нэһилиэккэ гимн курдук ылланар, кэрэхсэнэр. Муома оройуонун Хонуу, Орто-Дойду, Соболоох бөһүөлэктэриттэн уһуйаан иитиллээччилэрэ уонна оскуола оҕолоро түөрт бөлөҕүнэн дуобакка күөн көрүстүлэр. Барыта 64 оҕо кэлэн кытынна.
Күрэххэ П.И. Атласов аймахтара, уолаттара, нэһилиэк баһылыга П.С. Федоров кэлэн ыалдьыттаатылар, баҕа санааларын эттилэр. Сытыы киирсиилэр түмүктэринэн уһуйаан иитиллээччилэригэр Ксения Максимова («Чуораанчык») уонна Радмир Дьяконов («Кэскил») бастаатылар, Маша Слепцова («Кэскил») уонна Костя Степанов («Кэнчээри») иккистээтилэр, Амелия Королёва («Теремок») уонна Уйусхан Черов («Солнышко») үһүс миэстэ буоллулар. Алын сүһүөх үөрэнээччилэригэр Амина Богдашина (Орто-Дойду) уонна Дьулусхан Черов ( Индигир) бастаатылар, Альмира Слепцова уонна Саша Атласов (Индигир) иккистээтилэр, Дора Коркина уонна Айтал Хадаров (Индигир) үһүстээтилэр. Орто сүһүөх үөрэнээччилэригэр Анжелика Фазульянова (спортшкола) уонна Никита Андросов (Индигир) бастаатылар, Дайаана Ченянова (Орто-Дойду) уонна Ваня Соломов (Индигир) иккис, Айыына Егорова (Хонуу) уонна Алёша Рожин (Орто Дойду) үһүс буоллулар. Улахан бөлөх оҕолорго Жанна Фазульянова (спортшкола) уонна Алик Слепцов (Хонуу) бастакы, Закира Уваровская уонна Тимур Уваровский (Орто-Дойду) иккис, Лия Терешкина (Хонуу) уонна Павел Богдашин (Орто-Дойду) үһүс миэстэ буоллулар.
Кыайыылаахтар анал кубоктарынан, мэтээллэринэн, бириистэринэн наҕараадаланнылар. Кыттааччыларга туоһу суруктар туттарылыннылар. Бу күрэххэ оҕолор бэйэ-бэйэлэрин кытта билистилэр, доҕордостулар. Ыалдьыттар уонна кыттааччылар Индигир оскуолатын кэлэктиибэ (дириэктэр С.А. Сен-Дун-Шен) эйэҕэс көрсүүтүн, минньигэс аһын, үрдүк таһымнаах тэрээһинин бэлиэтээтилэр уонна махтаннылар. Бу дуобат күрэҕэ спорт уонна доҕордоһуу түһүлгэтэ буолбутун өссө биирдэ итэҕэттэ.