Сэтинньи 3 күнүгэр Майа сэлиэнньэтигэр улуустааҕы «Мэҥэ кэскилэ» оҕо тэрилтэтин лиидэрин талыы буолан ааста.
Улууспут бары нэһилиэктэрин оскуолаларыттан бастыҥ, актыбыыс оҕолор салайааччыларын кытта кэлэннэр тэрээһиҥҥэ кытыннылар. Олус элбэх оҕо кэлэн астынан-дуоһуйан, оонньоон-көрүлээн, элбэх оҕолору кытта билистибит.
Улууспут аҕа баһылыга Дмитрий Иванович Тихонов, улуус үөрэҕин управлениетын начальнига Николай Лукич Никифоров, учууталлар кэлэннэр бу тэрээһиҥҥэ ыалдьыттаатылар. Оскуола лидердара улуус баһылыгыттан удостоверениеларын туттулар.
Тэрээһин саҕаланыытыгар оҕолор эҕэрдэ нүөмэрдэрин көрдөрбүттэрэ. Ол кэннэ лидердар бэйэлэрин туһунан кэпсээбиттэрэ, билиһиннэрбиттэрэ. Онтон улуус баһылыга оҕолор араас боппуруостарыгар эппиэттээбитин кэннэ оҕолор бэйэлэрин санааларын, туох саҥа идеялаахтарын үллэстибиттэрэ.
Тэрээһин сүрүн чааһыгар саала хас биирдии киһитэ куоластааһыҥҥа кыттыбыта. Лиидэр кандидатуратыгар барыта 4 онус кылаас оҕолоро турбуттара: Майа лицейын үөрэнээччитэ Евдокия Соловьева, Майа 1 № орто оскуолатын үөрэнээччитэ Николай Романов, Хаптаҕай уола Юрий Павлов уонна Майа 2 № орто оскуолатын үөрэнээччитэ Степан Петров. Куоластааһын түмүгүнэн, Майа лицейын 10 кылааһын үөрэнээччитэ Евдокия Соловьева «Мэҥэ кэскилин» лиидэрин аатын сүктэ. Кини сүрүн сыала — улуус бары оскуолалар актыбыыстар тэрилтэлэрин интернет ситимин нөҥүө түмэн, бука барыларын кытыннаран үлэни тэрийэн ыытыы буолар.
Түмүккэ оҕолор 6 хамаандаҕа арахсаммыт бэйэ-бэйэни кытта билсэ таарыйа араас бэһиэлэй оонньуулары оонньоон олус астыммыппыт. Бэрт интэриэһинэй тэрээһин буолан ааста диэн сыаналаабыппыт.
Сайаана Захарова, 10 кылаас, «Проба пера» эдэр корреспондена, Чыамайыкы Мэҥэ-Хаҥалас