Алтынньы 28 күнүгэр Кэбээйи орто оскуолатыгар оҕо эбии дьарыктаах буоларыгар «Точка Роста» киин иһинэн үлэлиир куруһуоктар маастар-кылаастар олус сэргэхтик буолан аастылар. Дьарыктар 5-8 кылаас оҕолоругар уонна төрөппүттэргэ тус-туһунан бөлөхтөрүнэн ыытылыннылар.
Бу тэрээһин, бастатан туран, оҕо сатабылын, дьоҕурун сайыннарар, оҕо бэйэтин сатабылын сатаан дьоҥҥо тиэрдэрин ситиһэр сыаллаах буолла. Оскуолабытыгар элбэх талааннаах, дьоҕурдаах, сатабыллаах учууталлар бааллар. Кинилэр бэйэлэрин маастар-кылаастарын ыытан, оҕолору уонна төрөппүттэри элбэххэ үөрэттилэр.
Уопсайынан, оҕолор 6 хайысханан сылдьан элбэххэ үөрэннилэр: «Медиацентр», «Дизайн», «VR-очки», «Робототехника», «Спасательные работы», «Сахалыы төрүт оонньуулар». Маныаха улахан кылаас оҕолоро учууталларыгар көмөлөстүлэр.
«Медиацентр» куруһуокка оҕолор интервью ыларга, видеоҕа уһулларга, хаартыскаҕа түһэрэргэ үөрэннилэр. «Дизайн» куруһуок маастар-кылааһыгар 3Д-моделирование бырайыактарын оҥорорго холоннулар. Саамай элбэх оҕо «VR-очки» уонна «Робототехника» куруһуоктар түһүлгэлэригэр тоҕуорустулар. Оскуолаттан тэйэн виртуальнай атын эйгэҕэ көтөн, робот массыыналарынан футболлаан, олус астыннылар.
Оттон төрөппүттэрбит «Спасательные работы» диэн түһүмэххэ сүүрэн-көтөн, оҕо саастарын санаатылар. «Сахалыы төрүт оонньуулар» хас биирдии оҕо өйүн сайыннарар, түргэн туттуулаах буоларга үөрэтэрин бу маастар-кылааска түбэспиттэр сэргээтилэр.
Түмүккэ төрөппүттэр үөрүүлээх тэрээһиҥҥэ кыттыыны ылбыттарыгар махтанан туран, инникитин өссө да маннык тэрээһиннэр тэриллэллэрэ кэскиллээҕин бэлиэтээтилэр.
Валя ГУЛЯЕВА, 8 кылаас үөрэнээччитэ,
«Дьоҕур» пресс-киин Кэбээйи орто оскуолата.