Алтынньы ыйга Н.О. Кривошапкин аатынан Өймөкөөн орто оскуолатыгар “Үтүө санаа” аахсыйата тэриллибитэ. Аҕам саастаахтарбытын эҕэрдэлээн ыалдьыттаатыбыт, санааларын өрө көтөхтүбүт.
Ол курдук, V кылаастар (сал. Игорь Михайлович Винокуров) Биэрэк Үрдүн бөһүөлэгэр олорор саамай убаастанар Герой ийэҕэ Рахима Николаевна Атласоваҕа ыалдьыттаата. VI кылаастар оскуолабыт биир саамай ытыктанар Өймөкөөн улууһун Бочуоттаах олохтооҕор, РФ, СӨ үөрэҕириитин туйгунугар, Елена Петровна Поповаҕа отоннорун туттардылар.
VII кылаастар (сал. Людмила Павловна Репина) Өймөкөөн орто оскуолатын бэтэрээн учуутала Мария Семеновна Вензельга “Витамины на зиму” диэн айылҕа бэлэҕин анаатылар. VIII кылаастар (сал. Марина Ивановна Слепцова), үлэ бэтэрээнин, Петр Афанасьевич Кондакову бэйэлэрэ астаабыт туортарынан күндүлээтилэр.
IX кылаастар (сал. Варвара Васильевна Лукина) үлэ, тыыл бэтэрээнэ Мария Григорьевна Винокурованы эҕэрдэлээтилэр. X кылаас салайааччыта Ольга Васильевна Борисова оҕолорун кытта СӨ “Үлэҕэ килбиэнин иһин” мэтээл хаһаайкатыгар, педагогическай үлэ Бочуоттаах бэтэрээнэ Вера Афанасьевна Аммосоваҕа үөрэн-көтөн отон бэлэхтэрин туттардылар.
Быйылгы выпускниктар туризм сайдыытыгар үлэлэспит, РГО чилиэнэ, педагогическай үлэ бэтэрээнэ, кыраайы үөрэтээччи, хас да кинигэ ааптара, Тамара Егоровна Васильеваҕа отоннорун бэлэх ууннулар.
Аҕам саастаахтарбыт ис истэриттэн үөрэн, алгыс тылларын анаатылар.
Давид Канаев, Н.О. Кривошапкин аатынан
Өймөкөөн орто оскуолатын VII кылааһын үөрэнээччитэ