Уран тыл ууһа Күннүк Уурастыырап аатын үйэтитэр ааҕыылары суруйааччы аатын сүгэр Эмис оскуолата 1992 сыллаахтан ыытар. Бастаан улуус таһымыттан саҕаланан, улам кэҥээн, өрөспүүбүлүкэ таһымыгар быйыл иккис төгүлүн ыытылынна.
Быйылгы ааҕыылар саха норуодунай бэйиэтэ В.М.Новиков-Күннүк Уурастыырап төрөөбүтэ 115 сылыгар, Саха Өрөспүүбүлүкэтигэр Үөрэх эйгэтигэр Ааҕыы сылыгар ананна.
Алта хайысханан 149 үлэ киирдэ. 143 үөрэнээччи, 7 учуутал, 3 библиотекарь, 1 эбии үөрэхтээһин педагога кытынна, барыта 154 киһи кытынна.
- Суруйааччы олоҕун, айар үлэтин сырдатар уруок, презентация көрүүгэ 11 үлэ;
- Күннүк Уурастыырап айымньыларынан буктрейлер көрүүгэ 6 үлэ;
- Өйтөн суруйууга 10 үлэ;
- “Ымыы чыычаахтарым, ыллааҥ” ырыа видеокүрэҕэр 15 үлэ;
- “Хоһооннорум,кутуу көмүс дорҕооннорум” уус-уран ааҕыыны көрүүгэ 62 үлэ;
- “Саха барытын сатаатын” уруһуй күрэҕэр 45 үлэ.
Дьүүллүүр сүбэҕэ учууталлар методическай холбоһуктара үлэлээтилэр.
Хайысха аайы «Кылаан Чыпчаал», «Добун сурук»1, 2, 3 Үрдэлэ, «БиҺирэбил сурук» туттарылыннылар. Маны сэргэ, «Өйтөн суруйууга» «Кылаан Чыпчаал» ааты ылбыт кыттааччыга Ольга Саввична Михайлова, бэйээт аймаҕа, «Айар» бэчээт кыһатын анал сертификатын анаата.
Тэрийээччилэр ааттарыттан ааҕыыга кыттыбыт бары учууталларга, үөрэнээччилэргэ, салайааччыларга махталбытын тиэрдэбит!
Эһиги Күннүк Уурастыырап айымньыларын ааҕаҥҥыт, саҥаны, уратыны билбиккит буолуо диэн бигэ эрэнэбит.
Күннүк Уурастыырап айымньылара 21 үйэ оҕолоругар чугаһын, болҕомтотун тардар кыахтааҕын илэ көрөн итэҕэйдибит, үөрдүбүт. Хас биирдии оҕо айымньыны тус бэйэтэ уратытык ылынан ааҕара, өйдүүрэ биһиги санаабытын кынаттыыр, саха литературата инникилээҕэр эрэл санааны угар.
Күннүк Уурастыырапка аналлаах тэрээһиннэр салгыы ыытылла туруохтара, ол курдук төрөөбүт күнүгэр бэйээт хоһооннорун ааҕыыга челлендж ыытыллыа, сэтинньи ыйга буолар Олоҥхо күнүгэр анаан суруйааччы » Тойон Дьаҕарыма» олоҥхотун Амма улууһун оскуолаларынан ааҕыыта түмүллүө.
Сахалыы айымньылары ааҕыҥ, умсугуйуҥ, үүнүҥ-сайдыҥ!
Уурастыырап хоһоонноро өрүүтүн
Үгүс өйү, сүрэҕи
Үөрдэ, күүрдэ, көҕүтэ,
Үлэ, олох күргүөмүгэр
Өрөкүйэр күүстээтиннэр!
Тэрийэр бөлөх.