Бүгүн, ахсынньы 13 күнүгэр, V «Эргиэн» өрөспүүбүлүкэтээҕи бизнес-оонньуу тэрийээччилэрэ Н.Е.Мординов-Амма Аччыгыйа аатынан «Кэскил» оҕо бэчээтин кыһата уонна В.П. Ларионов аатынан Майа орто оскуолата күрэх түмүгүн таһаардылар уонна кыайыылаахтары ааттаатылар. Ол курдук, маҥнайгы миэстэни Мэҥэ-Хаҥалас улууһун Кеша Алексеев аатынан Хаптаҕай орто оскуолатын хомуур хамаандата ылан кыайыы өрөгөйүн ситистэ!
Хаптаҕай орто оскуолатын хамаандатын састаабыгар киирбит үөрэнээччилэр: Алена Афанасьева (10 кыл.), Карина Васильева (10 кыл.), Арина Терентьева (9 кыл.), Юра Павлов (9 кыл.), Антон Иванов (8 кыл.) «Miracle» бенто тортары оҥорон таһаарар бизнес-бырайыагы көмүскээтилэр уонна тэрийээччилэртэн бэртээхэй бирииһи сүүйдүлэр: «Кэскил» оҕо бэчээтин кыһатыттан — бииргэ үлэлэһэр туһунан биир сыллаах сөбүлэҥи баттаһыыны уонна «Эргиэн» бизнес-оонньуу ааптарыттан Семен Посельскайтан саҥа дьыллааҕы сынньалаҥ кэмигэр ыытыллар бизнес-уруоктар куурустарын!
Маны таһынан, «Саамай элбэх көрүүлээх уонна лайктаах» анал аат хаһаайыннара — Халбаакы орто оскуолата бизнес-уруоктарга үөрэнэр куурсунан эмиэ наҕараадаланна.
Санатан этэр эбит буоллахха, бэһис төгүлүн ыытыллар «Эргиэн» бизнес-онньууга өрөспүүбүлүкэбит оскуолаларыттан уопсайа 12 хамаанда кытынна, ол курдук, Өктөм, Эдьигээн, Баайаҕа, Халбаакы, Дьохсоҕон, Атамай, Бөтүҥ, Уолба, Хаптаҕай, Булгунньахтаах, Боруулаах, Танара, Чурапчы орто оскуолалара олус көхтөөхтүк кыттан, бэйэлэрин бырайыактарын көмүскээтилэр. Кыттыыны ылбыт оҕолор бары да маладьыастар!
Кыайыылаах хамаандаҕа уонна кыттыбыт оҕолорго бэйэбит эҕэрдэбитин өссө төгүл тиэрдэбит уонна инникитин өссө үрдүк ситиһиилэри баҕарабыт! Аныгыс күрэххэ көрсүөххэ диэри!