Кытаанах нэһилиэгэр 90 да 25 миэстэлээх оскуола-саад аһылынна. Үөрүүлээх күҥҥэ СӨ Ил Дархана Айсен Николаев ыалдьыттаата. Оскуола «Тыа сирин кэлимник сайыннарыы» бырагырааманан тутулунна. Ил Дархан Айсен Николаев эҕэрдэлээн туран, өссө ситиһиилээхтик үлэлээҥ, Улуу Арассыыйаҕа тиийэ биллэр дьон үүнэн таҕыстыннар диэтэ уонна оскуолаҕа автобус ылалларыгар сертификаты туттарда. Ол туһунан улуус хаһыата «Саҥа олох» иһитиннэрэр.
Оскуола дириэктэрэ Вячеслав Яковлев: «Бүгүн биһиэхэ үөрүүлээх күн. Өр кэтэспит, ыра санаа оҥостубут оскуолабыт аһылынна. Биһиги оскуолабытыгар улуу тириэньэр Дмитрий Петрович Коркин, худуоһунньук Афанасий Петрович Собакин, суруйааччы Василий Семенович Яковлев-Далан, сахалартан бастакы психологическай наука доктора Анастасия Петровна Оконешникова, сахалартан бастакы филологическай наука доктора Евдокия Иннокентьевна Коркина курдук биллиилээх дьон үөрэммиттэрэ.
Оскуолабыт 2016 сыллаахха уокка былдьанан, 4 сиринэн үөрэнэн кэллибит. Оҕолорбут да, учууталларбыт да маннык үөрэнэн эрэйдэннилэр. Оттон бүгүн тупсаҕай усулуобуйалаах, саҥа, таас оскуолаҕа киирэн, кинилэр үөрүүлэрэ муҥура суох. Онон СӨ Ил Дарханыгар Айсен Сергеевичкэ, өрөспүүбүлүкэ Бырабыыталыстыбатыгар, оскуолабыт олоххо киирэригэр сүүрбүт-көппүт биир дойдулаахтарбытыгар, выпускниктарбытыгар уонна генеральнай бэдэрээччиппитигэр «Восток-Капитал» тэрилтэҕэ махтанабыт», — диэн этэр.
Н.Е.Мординов-Амма Аччыгыйа аатынан «Кэскил» оҕо бэчээтин кыһата бу үөрүүлээх күнүнэн эҕэрдэлэргэ, этиллибит үтүө тылларга кыттыһан туран, инникитин даҕаны кэнчээри ыччаты иитэр-үөрэтэр сыралаах, кэскиллээх үлэҕитигэр үрдүктэн үрдүк ситиһиилэри баҕарабыт!